Ózge ult ókilderi arasynda uiymdastyrylǵan «Men qazaqsha sóileimin!» atty respýblikalyq baiqaý máresine jetti, dep habarlaidy "Ult aqparat".
Sh.Shaiahmetov atyndaǵy «Til-Qazyna» ulttyq ǵylymi-praktikalyq ortalyǵy uiymdastyrǵan baiqaýdyń sharty boiynsha úmitker qazaqtyń «Batyrlar jyrynan» bireýin jatqa mánerlep oqyp berýge tiis boldy.
«Memleket basshysy «Ana tili» gazetine bergen óziniń arnaiy suqbatynda qazaq tilin jaqsy biletin ózge ult ókilderin qoldaý týraly tapsyrma bergen bolatyn. Bul aktsiianyń maqsaty – jastardy eline degen súiispenshilik, adaldyq, eńbekqorlyq, ar-namys tárizdi adamgershilik qundylyqtar negizinde tárbieleý jáne qazaq tilin ultaralyq qatynas tiline ainaldyrýdy keńinen nasihattaý. Qataryńyzdyń kóptigi, árbirińizdiń jan-jaqty daiyndyǵyńyz kóńil qýantpai qoimaidy», - dedi qorytyndy bas qosýda quttyqtaý sóz sóilegen Til komitetiniń tóraǵasy Ádilbek Qaba.
«Til-Qazyna» ortalyǵynyń bas direktory, jazýshy Álibek Asqardyń pikirinshe, elimizdiń on tórt óńiri men úsh qalasynan eńbektegen sábiden eńkeigen kárige deiin 20 etnos ókilinen quralǵan 243 úmitker qatysqan. «Qobylandy batyr» jyry baiqaý barysynda 76 ret tolǵansa, odan keiin «Alpamys batyr» eposy tur.
Qatysýshylardyń jas ereksheligine kóz júgirtsek, eń jasy –Nur-Sultan qalasy «Báiterek» balabaqshasynyń tárbielenýshisi 5 jasar Mariia bolsa, úlkeni – Shymkent qalasynyń turǵyny, zeinetker Fatkýlbaianova Nasima Borisqyzy eken.
«Bala kúnimizden «Batylar jyryn» basymyzǵa jastanyp ósken halyqtyń urpaǵymyz ǵoi. San ǵasyrlar qoinaýynan kele jatqan jyr jaýharlarynan ózge ult ókilderiniń eki aidan astam ýaqyt boiy sóz marjanyn tókkenin kórgenińde, qazaq tiliniń bolashaǵy týraly eriksiz úlken úmitpen oilanyp qalasyń», – dedi ol.
Uiymdastyrýshylardyń aitýynsha, «Batyrlar jyrynan» basqa, patriottyq rýhtaǵy poeziialyq shyǵarmalar men tarihi taqyrypqa arnalǵan ballada-dastan oqyǵandar boldy.
«Batyrlar jyrynan» úzindini mánerlep jatqa oqyp, áleýmettik jelide eń kóp lúpil jinaǵan tómendegi azamattar júldeger bolyp anyqtaldy. Olardyń árqaisysyna 30 myń teńge kóleminde syilyqaqy berildi:
Pavlodar oblysy Ekibastuz qalasy №25 qazaq qyzdar gimnaziiasynyń 11-synyp oqýshysy Legkaia Inessa Viktorovna,
Aqtóbe oblysy Alǵa aýdany Balalar men jasóspirimder sport mektebiniń jattyqtyrýshy-oqytýshysy Karasaeva Ilona Aleksandrovna,
Túrkistan oblysy Sozaq aýdanynyń turǵyny Ashirmet Sitara Sultanmuratqyzy,
Taraz qalasy «Habar-24» telearnasynyń tilshisi Tregýbova Viktoriia Viacheslavovna,
Túrkistan oblysy Saryaǵash aýdany, Arystanbap joǵary kolledjiniń 2-kýrs stýdenti Ravan-Nahchivani Indira.
Budan basqa mánerlep oqyp, sheberlik kórsetken taǵy 10 úzdik qatysýshy QR Mádeniet jáne sport ministrligi Til saiasaty komiteti tóraǵasynyń diplomymen marapattaldy. Olar: Qaraǵandy oblysy, Priozersk qalasy №2 orta mekteptiń 7-synyp oqýshysy Kýznetsov Vladimir, Almaty oblysy Talǵar aýdany №4 jalpy bilim beretin mekteptiń bastaýysh synyp muǵalimi Poplavskaia Elena Igorevna, Pavlodar oblysy Shaqat orta mektebiniń 11-synyp oqýshysy Evloeva Galina, Qaraǵandy oblysy, Priozersk qalasy №2 orta mekteptiń 8-synyp oqýshysy Mýrashkina Diana Aleksandrovna, Almaty qalasy №110 mektep-gimnaziianyń 6 «D» synyp oqýshysy Kýzovnikov Rýslan, Aqtaý qalasynan muǵalim Silchenko Irina Sergeevna, Aqtóbe oblysy, Qobda aýdany Taldysai aýyldyq klýby qyzmetkeri Maltsev Aleksandr Vladimirovich, Almaty oblysy Qapal aýyly ákimi appartynyń bas mamany Chepel Vladimir Sergeevich, Shymkent qalasy M.Mametova atyndaǵy №111 jalpy orta bilim beretin mekteptiń 9-synyp oqýshysy Abdýgafýrova Aziza, Nur-Sultan qalasy «№1 Báiterek» balabaqshasynyń tárbielenýshisi Mariia.
Shara moderatory ortalyq direktorynyń orynbasary Aidos Tursynbaiuly málimdegendei, bul baiqaýdan eshkim qur alaqan qalǵan joq. Óitkeni aramyzda qazaq tilinde sóilemeitin nemese sóilesem, jańsaq aityp kúlki bolamyn-aý dep áli de bolsa tartynyp, orynsyz qysylyp júrgenderge bulardyń árqaisysynyń batyl áreketi úlgi bolarlyq. «Batyrlar jyrynan» jatqa úzindi oqyp, qazaq tilin nasihattaý boiynsha qosqan úlesi úshin barlyq talapkerge «Til-Qazyna» ulttyq ǵylymi-praktikalyq ortalyǵy bas direktorynyń Alǵys haty tabystaldy.
