Sh. Shaiahmetov atyndaǵy «Til-Qazyna» ulttyq ǵylymi-praktikalyq ortalyǵynda «Men qazaqsha sóileimin» respýblikalyq aktsiiasynyń jeńimpazdary marapattaldy, dep habarlaidy "Ult aqparat".
«Men qazaqsha sóileimin» respýblikalyq aktsiiasy qazaq tiliniń damýyna eleýli úles qosyp júrgen etnos ókilderin biriktirdi.
Osylaisha, búgin aktsiianyń III kezeńine qatysqan JOO stýdentteri men eresek turǵyndardy marapattaý rásimi ótti.
«Til – mádeniettiń negizgi elementi jáne ult pen onyń birligin qalyptastyrýdyń múltiksiz sharty bolyp sanalady. Qazaq tilin saqtaý jáne damytý memleketimizdiń mádeni saiasatynyń asa mańyzdy mindetin quraidy. Sizder de memlekettik tildiń saqtalýy men damýyna baǵa jetpes úles qosyp otyrsyzdar», - dedi QR Bilim jáne ǵylym ministrligi Til saiasaty komitetiniń tóraǵasy Ádilbek Qaba marapattaý rásiminde.
QR Táýelsizdiginiń 30 jyldyǵyn merekeleý aiasynda ótkizilgen aktsiiaǵa respýblikanyń 14 óńirinen 171 adam qatysty.
19 etnos ókilderi belgili qazaq aqyndarynyń týǵan el, týǵan jer, ana tili taqyrybyndaǵy jyr jaýharlarynan úzindilerdi mánerlep jatqa oqydy.
Onda óz óleńderin oqyǵan daryndy qatysýshylar da bolǵan.
«Qatysýshylar arasynda orys ultynyń ókilderi basym – 70 qatysýshy. Ózbek, tatar, dúngen, kúrd, nemis, ázerbaijan ulttarynyń ókilderi de belsendi qatysýshylar qatarynda boldy. Olardyń basym kópshiligi Qostanai, Jambyl, Túrkistan, Qaraǵandy, Aqtóbe oblystarynan habarlasqan. Barlyq materialdardy muqiiat zerdelegen qazylar alqasynyń sheshimimen Hamida Sametova (ShQO), Galina Kochetkova (Aqtóbe), Olga Kefer (Aqtóbe), Anna Korchemkina (BQO), Masrýr Adeeva (Shymkent) aktsiia jeńimpazdary bolyp tanyldy», - dep habarlady «Til-Qazyna» ortalyǵynyń baspasóz qyzmeti.
Al yntalandyrý diplomdarymen Viktoriia Doroshko (Qostanai obl), Mariiam Tochieva (Aqmola obl), Kahrabo Iýldasheva (Nur-Sultan), Aniýta Tregýb (Aqtóbe obl), Anastasiia Gross (ShQO), Indira Belskaia (ShQO), Majit Gerfanov (Qostanai) jáne Svetlana Tarasova (Nur-Sultan) marapattaldy.
Esterińizge sala keteiik, aktsiianyń 5-8 synyp oqýshylary arasynda ótken I kezeńine 22 etnostan 326 adam qatysty, onyń basym kópshiligi (214 adam) orys ultynyń ókilderi boldy. 9-11 synyp oqýshylary men kolledj stýdentteri arasynda ótken II kezeńge 14 etnostan 213 adam qatysqan.
Endi kelesi kezeń (6 tamyzdan 6 qyrkúiekke deiin) quqyq qorǵaý, ishki ister organdary ókilderiniń arasynda ótedi.
Qatysýshylardyń materialdary Instagram jelisinde #menqazaqshasóileimin2021 heshtegimen jariialanǵan.
