Almaty ákimi Baqytjan Saǵyntaevpen kezdesýde Zerdeli shaǵyn aýdanynyń turǵyny qisaiǵan úidiń taǵdyry jaily suraq qoidy, dep habarlaidy QazAqparat.
«Bizben kezdesýde qisaiǵan úidi túzetip beremiz dep aitylǵan bolatyn. 6 jyl buryn ǵimaratty salǵan baqylaýshy, qurylys kompaniiasy organdary nege nashar jumys istegen? Bizdiń taǵdyrymyz ne bolady?» - dedi qala turǵyny.
Qala ákimi saýal qoiǵan turǵynǵa janaiqaiyn túsinetinin jetkizdi.
«Ózderińizben kezdesýde sizder suraq qoiǵan bolatynsyzdar. Osy úidi birqalypqa keltirgen soń, qaita qisaiyp qulamai ma, oǵan kepildik beresiz be dep suraǵan edińizder. Men de adamnyń balasymyn, Qudaidan qorqamyn. Men de eshkimniń nalasyna qalǵym kelmeidi. Negizgi másele «úidi túzettik, al kire qoiyńdar, problemanyń sheshimi tabyldy, endi sizderdi tanymaimyz» degende emes. Kóp sharalar atqaryldy. Institýttan mamandar shaqyryldy. Neden bolǵanyn qarady. Esebin qalai ornyna keltirýge bolatynyn shyǵardy. Ornyna keltiretin jumystar júrgizilip jatyr. Ózderińiz bilesizder, sáýir-mamyr arasynda bul jumystar bitedi. Biz mamandardyń, tolyq táýelsiz sarapshylardyń qorytyndysyn kútemiz. Olardyń aitýynsha, úidiń jaǵdaiy birqalypty. Úidiń qunyna bailanysty ártúrli usynystar kelip jatyr. Ol jerdi jalǵa alyp otyrǵandar da bar, ipotekaǵa alyp otyrǵandar da bar. Jaqynda ózderińizdi jinap sheshimin aitamyz», - dedi qala ákimi.
Almatyda qisaiǵan úige qatysty zertteý qorytyndylary shyqty.
Mamandardyń pikirinshe, qisaiǵan úidiń barlyq problemalary túpkilikti sheshilgenine kóz jetkizgenge, iaǵni úsh aiǵa deiin sozylýy múmkin. Sonymen qatar, Zerdeli yqsham aýdanyndaǵy barlyq 32 úi boiynsha zertteý júrgizilip, QazǴZI-diń usynymdary shyqpaq.
Qazirgi ýaqytta barlyq turǵyndar qala ákimshiligi esebinen jalǵa beriletin turǵyn úimen qamtamasyz etilgen. Adamdarǵa balalaryn balabaqshalar men basqa da bilim berý mekemelerine ornalastyrýǵa kómek kórsetilýde.
