Memlekettik organdardyń barlyq esebi bir aqparattyq júiege biriktiriledi. Bul týraly QR Strategiialyq josparlaý jáne reformalar agenttigi tóraǵasynyń orynbasary Aigúl Shaiymova aitty, dep habarlaidy QazAqparat.
«2000 jyldardyń basynda-aq qaǵazsyz qujat ainalymyna tolyq kóshý mindeti qoiylǵan bolatyn. Qujattar elektrondy túrde jasalyp, qaǵaz túrinde shyǵarylady. Sondyqtan da atalǵan printsipti júzege asyrýǵa qatysty Prezident Jarlyǵynda birqatar is-shara kózdelgen. Birinshi – normativ aiasynda qaǵazben jumys isteýden bas tartý. Bul atalǵan biznes protsesti aitarlyqtai ońtailandyrady. Óitkeni, ol qaǵazdy basyp shyǵarýdan bólek árbir qujattyń paraǵyn salystyryp tekserýdi talap etedi. Soǵan orai qujatty rásimdeýge birshama jumys ýaqyty jumsalady», - dedi ol Ortalyq kommýnikatsiialar qyzmetindegi baspasóz máslihatynda.
Sonymen qatar tóraǵa orynbasary protsedýralyq máselelerdiń de jetildiriletindigin atap ótti. Máselen, jaýap berilmegen jaǵdaida kelisim alyndy degen qural engiziledi.
«Qazirgi ýaqytta tipti memlekettik organnyń eskertpesi bolmasa da ol jobany ázirleýshige jazbasha jaýap berýge mindetti. Endi mundai qajettilik alynyp tastalady. Bul jaýap daiyndaýǵa ketetin jumys ýaqytyn aitarlyqtai qysqartady. Ásirese mundai norma Ádilet, Ulttyq ekonomika, Qarjy ministrlikteri siiaqty mindetti kelisim berýshi memlekettik organdardyń jumysyn jeńildetedi. Memlekettik organdar arasynda saýal joldaýdy alyp tastaý – bul memlekettik organdardyń ishki biznes-protsesterin jáne bailanyssyz ózara is-qimyldy ońtailandyrýǵa baǵyttalǵan kelesi norma. Endgi ýaqytta memlekettik organdardan vedomstvolyq málimetterdi talap etýdiń qajeti joq. Olardy aqparattyq resýrstan ala salýǵa bolady. Resýrstaǵy málimetter qate bolsa, onda derekterdi ózektendirýge jáne jańartýǵa jaýapty memlekettik organ jaýapkershilik arqalaidy. Sonymen qatar esepterdiń barlyq túrin bir aqparattyq júiege biriktirý josparlanǵan. Endigi ýaqytta memlekettik organdarǵa qajetti málimetterdi ártúrli derekkózderinen izdeýdiń qajeti joq. Olardyń barlyǵy bir júiege shoǵyrlandyrylady», - dedi Aigúl Shaiymova.
