Memlekettik organdar jyl sońyna deiin 24 aqparattyq anyqtamany alyp tastaidy. Bul jaiynda QR Tsifrlyq damý, innovatsiialar jáne aeroǵarysh ónerkásibi ministri Asqar Jumaǵaliev málim etti, dep habarlaidy "Ult aqparat".
«Áriptesim Erlan Turǵymbaevtyń azamattarǵa taiaýda júrgizýshi kýáligi men tehpasportty ózimen birge alyp júrýiniń qajeti bolmaityny týraly aitqany keshegi kúnniń basty jańalyǵy boldy. Bul shyn máninde, kópten kútken sheshim. Memleket pen azamattyń ózara tsifrlyq is-qimylyn jaqsartýǵa jasalǵan úlken qadam. Politseilerdiń júrgizýshilerden bul qujattardy talap etpei-aq, onyń bar-joǵyn JSN arqyly tekserýine tehnikalyq múmkindikter bar», - dep jazdy ministr Facebook paraqshasynda.
Onyń atap ótýinshe, qazir Senatta qaralyp jatqan «Tsifrlyq tehnologiialar týraly» zań jobasy qabyldanǵannan keiin, eGov Mobile mobildi qosymshasyndaǵy tsifrlyq qujattar tolyq zańdy kúshke ie bolyp, qaǵaz qujatpen birdei qoldanylady. Iaǵni, siz politsiia qyzmetkerine óz kýáligińizdiń tsifrlyq nusqasyn smartfonnan kórsete alasyz.
«Ázirge mobildik qosymshada 4 túrli qujattyń tsifrlyq nusqasy bar: jeke kýálik, balanyń týý týraly kýáligi, neke qiiý jáne buzý, atyn, tegin, ákesiniń atyn aýystyrý týraly. Biz memlekettik organdarǵa qosymshada sondai-aq, stýdenttik kýálik, áskeri bilet, múgedektik týraly kýálik, jyljymaityn múliktiń tehnikalyq pasporty jáne taǵy basqalary bolýy úshin qajetti integratsiiany júrgizýdi usyndyq. Bul qujattardyń mobildik qosymshada tsifrlyq nusqalarynyń bolýy azamat úshin óte yńǵaily bolar edi dep oilaimyn», - dedi ol.
Sonymen qatar, ministr memlekettik organdardyń azamattan talap etpei, ózderi ala alatyn anyqtamalardan bas tartýy jumystaryn júrgizip jatqanyn aitty.
«Jospar boiynsha, memlekettik organdar jyl sońyna deiin 24 aqparattyq anyqtamany alyp tastaýǵa ýáde berdi. Ol úshin olar óz integratsiiasyn aiaqtaýy, sondai-aq óz reglamentteri men NQA-ny ózgertýi tiis. Ómirimizge qajetti qaǵaz qujattar sanynyń azaiatyny qýantady. Taǵy qandai qujattardy tsifrlaý qajet dep oilaisyz?», - dedi Asqar Jumaǵaliev.
