QR Strategiialyq josparlaý jáne reformalaý agenttiginiń tóraǵasy Qairat Kelimbetov memlekettik josparlaý júiesinde qandai ózgerister bolatynyn aityp berdi, dep habarlaidy QazAqparat.
«2020 jylǵy 1 qyrkúiekte Memleket basshysy Qazaqstan halqyna Joldaýynda memlekettik josparlaý júiesin qaita qaraý boiynsha tapsyrma bergen edi. Mundaǵy basqarýdyń negizgi qaǵidasy – adamǵa baǵyttalý ustanymy bolmaq. Memlekettik josparlaý, biýdjettik josparlaý, memlekettik qyzmet, kórsetiletin qyzmetter, tsifrlandyrý siiaqty memlekettik basqarýdyń negizgi túpki júielerin qarastyryp, eń aldymen memlekettik organdardy jaýapkershilikterin arttyratyn, tapsyrmalardy iske asyrýdyń tiimdiligine yqpal etetin tásilderdi usynýǵa baǵdarladyq. Iaǵni memlekettik basqarýdyń túpki júielerin transformatsiialaý kerek jáne ony júieli júrgizý kerek degen qorytyndyǵa keldik. Osyǵan bailanysty ózgerister qabyldandy», - dedi Qairat Kelimbetov Ortalyq kommýnikatsiialar qyzmetinde ótken baspasóz máslihatynda.
Spikerdiń aitýynsha, jańa formadaǵy memlekettik josparlaý júiesi belgili bir baǵyttardy usynady jáne memlekettik josparlaýdyń jańa júiesinniń óz erekshelikteri bar.
«Eń aldymen, institýtsionaldyq reformalardy júrgizýge qajetti jaǵdailar jasalýda. Jalpyulttyq basymdyqtar elimizdiń negizgi baǵyttaryn, damý kórinisterin bekitedi, bul – bizdiń maqsattarymyz ben mindetterimizdi aiqyn kórsetetin 10 basymdyq. Basymdyqtarǵa sáikes, biýdjet qarajatyn bólý de qurylatyn bolady. Sondyqtan biýdjettik limitter memlekettik organdardyń basym mindetteri aiasynda bólinedi. Bizdiń qandai baǵdarlamalardy qarjylandyratynymyz, qai baǵdarlamaǵa basymdyq beriledi jáne qai baǵdarlama keiinnen qarjylanatyny anyq kórinedi», - dep atap ótti Qairat Kelimbetov.
Q. Kelimbetov jalpyulttyq basymdyqtardy Memleket basshysynyń ózi bekitetinin aitty.
«Ulttyq jobalardyń tizimin jaqyn arada Memleket basshysy bekitedi. Ulttyq jobalar portfelin iske asyrý jobalyq basqarý qaǵidattaryna negizdeledi», - deidi Qairat Kelimbetov.
