Elimizdiń memlekettik joǵary oqý oryndarynda endaýment-qor qurý múmkindigi paida boldy. Bul jaiynda Senat depýtattarynyń saýalyna QR Premer-Ministri Asqar Maminniń jaýabynda aitylǵan, dep habarlaidy QazAqparat.
«Búgingi tańda 28 memlekettik joǵary oqý orny 100 paiyz memleket qatysatyn kommertsiialyq emes aktsionerlik qoǵam (budan ári – KeAQ) bolyp qaita quryldy. Biyl KeAQ-qa Nazarbaev Ýniversitetiniń tájiribesi boiynsha basqarýshylyq derbestik berildi. Barlyq KeAQ-tyń jarǵylary bekitildi, Direktorlar keńesteri quryldy. Olardyń quramyna Bilim jáne ǵylym ministrliginiń memlekettik múlik, biznes jónindegi ýákiletti organnyń, sondai-aq prezidenttik jastar kadry rezerviniń ókilderi kirdi. Budan basqa, Nazarbaev Ýniversitetiniń tájiribesi boiynsha KeAQ-ta akademiialyq komitetter, sapany qamtamasyz etý jónindegi komitetter, institýttar, mektepter jáne taǵy basqalary qurylady. Budan ári Direktorlar keńesiniń strategiialyq josparlaý, kadrlar jáne syiaqylar, ishki aýdit jónindegi komitetteri bekitiletin bolady», - dedi Asqar Mamin.
Úkimet basshysynyń paiymynsha, bul ózgerister JOO-nyń óz qyzmetiniń nátijeleri úshin áleýmettik jaýapkershiligin arttyrýǵa, mamandardy daiarlaý sapasyn jaqsartýǵa baǵyttalǵan.
«Ýniversitetter biýdjetten tys qarjylandyrý kózderi esebinen ǵylymi bilim berý qyzmeti jónindegi zańdy tulǵalardy qura alady. Startap kompaniialar ashyp, jarǵylyq qyzmetti júzege asyrý úshin qosymsha qarjy jáne materialdyq qarajat kózderin tartady. Shet memleketterde filialdar qura alady. KeAQ-qa kóshken soń ýniversitetterde endaýment-qor qurý múmkindigi paida boldy. Onyń investitsiialyq tabysy ǵylymi jáne (nemese) bilim berý qyzmetin qarjylandyrýǵa, bilim alýshylarǵa, ǵalymdarǵa stipendiia tóleýge baǵyttalady. Qazirgi ýaqytta joǵary oqý oryndary damýdyń jańa strategiialyq josparlaryn, uiymdyq qurylymyn, shtat sanyn jáne taǵy basqalaryn ázirlep, bekitýde», - dedi Premer-Ministr.
