kollaj: inbusiness.kz
Memlekettik hatshy Erlan Qarin Almatydaǵy Balýan Sholaq atyndaǵy sport saraiynda bolǵan kontserttegi oqiǵaǵa qatysty pikir bildirdi. Bul keleńsiz jáit áleýmettik jelide jurttyń narazylyǵyn týdyrǵan edi.
Qarin kontsertti NS group JShS uiymdastyrǵanyn atap ótti.
"Almaty qalasyndaǵy kontsert kezinde bolǵan oqiǵa qazir qoǵamda qyzý talqylanyp jatyr. Bizdiń bilýimizshe, kontsertti NS group JShS uiymdastyrǵan. Shiza laqap atyn ielengen azamattyń Memlekettik týǵa qatysty áreketi jiti tekserilip, oqiǵanyń mán-jaiy anyqtalýy qajet. Kontsertte ishimdik ishilgendikten mundai áreketke jol berilgen dep oilaimyn. Jastar osy bir keleńsiz oqiǵadan sabaq alyp, qarapaiym mádeniet pen etiketti meńgerýi qajet", - dedi Memlekettik hatshy.
Sonymen qatar, Qarin mundai aýqymdy is-sharalardy uiymdastyrýshylar da jaýapkershilikti sezinýi keregin atap ótti.
"Olar kontsert uiymdastyrǵan kezde ishimdik ishilýine jol bermeýge, basqa da oqys oqiǵalardyń aldyn alýǵa tiis. Biz memlekettiligimizdiń, Táýelsizdigimizdiń simvoly sanalatyn Memlekettik týǵa zor qurmetpen qaraýymyz qajet. Ony aiaqasty etýge jol bermeýimiz kerek. Týymyzdy nemese basqa da rámizderimizdi qorlaǵan áreketter quqyqtyq-normativtik aktilerge sáikes jaýapkershilikke tartylady. Sebebi, zań barshaǵa ortaq. Elimizdiń árbir azamaty Memlekettik týdy qurmettep, qaster tutýy qajet dep sanaimyn", - dedi Erlan Qarin.
Eske salaiyq, 25 mamyrda Almatydaǵy Balýan Sholaq atyndaǵy sport saraiynda "Irina Kairatovna" men Shiza-nyń kontserti ótken bolatyn. Keiinirek Jeli qoldanýshylary "Irina Kairatovna" tobynyń múshesi Azamat Marklenov pen Ashat Jolshievtiń sahnadaǵy áreketin synady. Ánshiler sahnada boǵaýyz sóz de aityp ketken. Al ánshi Ashat Jolshiev Qazaqstannyń týyn adamdarǵa laqtyryp jibergen.
