11-12 cáýirde Kókshetaý jáne Petropavlda Memlekettik tildi damytý qorynyń ókilderi stýdent jastar, memlekettik organ ókilderi, jastar qoǵamdyq birlestikteri, ózge ult jastary, muǵalimder, ǵalymdar jáne jýrnalistermen kezdesýler ótkizdi.
Kezdesýler aimaqtaǵy jastardy ǵylym jáne bilim salasynda qoldaý maqsatynda QR Tuńǵysh Prezidenti - Elbasy qory men Aqmola jáne SQO oblystary Ákimdigi arasyndaǵy seriktestik týraly Memorandým aiasynda ótti.
Kezdesýde uiymdastyrýshylar «Rýhani jańǵyrý» baǵdarlamasy men qazaq tiliniń latyn grafikasyna kóshýin túsindirdi.
Is-sharalarǵa Memlekettik tildi damytý qorynyń direktory Azat Shaýeev, Qazaqstan Jazýshylar odaǵy Astana filialynyń basshysy Baýyrjan Qaraǵyzuly, Qordyń joba úilestirýshisi Áset Ospanov qatysty.
Memlekettik tildi damytý qorynyń direktory Azat Shaýeev alǵy sózinde qazaq tiliniń latyn grafikasyna kóshýi qazaq tilin jańǵyrtýǵa jáne elimizdiń tehnikalyq progresine jol ashatynyn atap ótti.
Kezdesýler barysynda smartfon jáne planshetterge (Android jáne iOS platformalary úshin) arnalǵan latyn áripterimen qazaqsha pernetaqta «Qazaq Latyn Keyboard» jańa jobasynyń tusaýkeseri ótti. «Qazaq Latyn Keyboard» qazaq tilin latyn qarpinde barlyq qosymshalarda qalypty qoldanýǵa múmkindik beredi. Qoldanýshylardyń yńǵaiyna jáne úirenýine arnalyp pernetaqta jiyntyǵynyń transliteratsiiasy jasaldy. Onyń kómegimen qazaq sózderin kirillitsada engizseńiz baǵdarlama avtomatty túrde engizý terezesinde mátindi latyn grafikasyna aýdarady. Osyndai tártippen kerisinshe jasaý arqyly qoldanýshylar jańa latyn qaripimen engizýdi úirene, jattyqtyra alady.
Budan bólek kezdesýler qatysýshylaryna Memlekettik tildi damytý qorynyń «Rýhani jańǵyrý» baǵdarlamasy aiasynda jasaǵan basqa da jobalary tanystyryldy. Bular qazaq tilin tegin oqytatyn «Soyle.kz» onlain kýrsy, «Kim bilgish?» intellektýaldy-tanymdyq mobildik oiyny, «Abaialemi.kz» onlain entsiklopediiasy, «Tattialma.kz» balalar ádebiet saity, «Qazaqstan3D» veb-saity jáne mobildi qosymshasy, «Jeti qazyna», «Meniń Kazahstanym», «Uly tulǵalar», «Qazaqstannyń merekeleri» mobildi qosymshalary.
Kezdesýler barysynda qatysýshylar arasynda qazaq álipbiiniń kezeńmen latynǵa kóshýiniń basty qyrlary jaiynda aýqymdy suhbat bolyp ótti. Sonymen qatar qatysýshylarmen «Latyn álipbiinde jyldam oqýǵa» baiqaý ótkizildi. Úzdik nátije kórsetkenderge estelik syilyqtar tabystaldy.
Memlekettik tildi damytý qorynyń direktory Azat Shaýeev is-shara sońynda, «Rýhani jańǵyrý» baǵdarlamasy - qoǵamnyń qýatty modernizatsiiasy jáne ýaqyt ózgeristerine tótep berýge múmkindik beretin, ulttyq sana-sezimdi ózgertetin uly reforma ekenin aitty.
