Memlekettik tilde sóilesem, meni bári qazaq dep qalady. Shymkent qalasyndaǵy Ulttyq ulanǵa qarasty 6698-áskeri bóliminde qyzmet etip júrgen Aleksandr Son osylai aitty, dep habarlaidy QazAqparat.
Aleksandr Son – Taldyqorǵan qalasynyń túlegi.
Aleksandr memlekettik tildi jaqsy biledi. Óitkeni I.Jansúgirov atyndaǵy Jetisý ýniversitetinde qazaq tili men ádebieti muǵalimi mamandyǵy boiynsha bilim aldy. Áskerge shaqyrylǵanǵa deiin óziniń altyn uia – mektebinde qazaq tilinen dáris berip te úlgerdi.
Qatardaǵy jaýynger A.Pýshkin ǵana emes, uly Abaidyń tilinde sóilegendi maqtan etedi.
«Men qazaq tilinde sóilesem, bári meni qazaq dep qabyldaidy. Biraq keibireýleri kózime qarap, «Káris emessiń be?» dep surastyryp jatady. Meniń oiymsha, Qazaq elinde turǵannan keiin kim-kimniń de memlekettik tildi meńgergeni jón. Odan sol adamnyń abyroiy arta túspese, kemimeidi. Qaita ultaralyq birlikti nyǵaitý úshin óte qajet. Bolashaqta Ulttyq ulan qatarynda qyzmet etýdi jalǵastyryp, qazaq tiliniń ásker arasynda keńinen taralýyna óz úlesimdi qossam deimin», deidi A.Son shynaiy kóńilmen.
QR Ulttyq ulany baspasóz qyzmetinen túsken málimetke qaraǵanda, Shymkentte 6506-áskeri bólimi de bar.
Atalmysh bólim jaýyngerleri politsiia qyzmetkerlerimen birge kóshe tynyshtyǵyn kúzetedi. Kún saiyn qoǵamdyq tártipti qamtamasyz etýge júzden astam sarbaz shyǵady.
Jalpy, Shymkentte 15 óńirden onnan astam ult ókilderi azamattyq boryshyn ótep júr.
