Qazaqstanda memlekettik satyp alýdy veb-portal arqyly baqylaýdyń arqasynda 2,8 mlrd teńge únemdeldi. Bul týraly «Atameken» ulttyq kásipkerler palatasy basqarma tóraǵasynyń orynbasary Erbol Óstemirov málim etti, dep habarlaidy QazAqparat.
Sybailas jemqorlyqqa qarsy is-qimyl agenttigi men «Atameken» UKP jemqorlyqqa qarsy birlese kúresý jumysynyń nátijesi týraly aita otyryp, palata ókili byltyr memlekettik satyp alý boiynsha veb-portaldyń iske qosylǵanyn eske saldy. Ol Samuryq-Qazyna, Báiterek pen Qazagronyń memlekettik alýyn biriktiredi. Bul portal baǵa dinamikasyn baqylaýǵa múmkindik beredi. Júie belgili bir aimaqtaǵy negizsiz satyp alýdy anyqtaidy.
«Eger taýardyń eń tómengi baǵasy 100 myń teńge bolsa, memlekettik organ ony 150-200 myń teńgege satyp alsa – júie qatelikke jol bergenin kórsetip beredi», - dedi Erbol Óstemirov agenttiktiń Facebook paraqshasynda bergen suhbatynda.
Onyń aitýynsha, Sybailas jemqorlyqqa qarsy is-qimyl agenttigi mundai jaǵdaida birden áreket etedi.
«Agenttiktiń ókilderi bul júiege kirip, kórýge jáne málimetti suratýǵa quqyly. Eger oryndy sebep aitylmasa, ol memlekettik satyp alý zertteledi. Osynyń arqasynda satyp alý jospary túzetilip, 2 mlrd 800 mln teńge únemdeldi», - dedi ol.
