Sybailas jemqorlyqqa qarsy is-qimyl agenttigi tóraǵasynyń birinshi orynbasary Oljas Bektenov memlekettik satyp alý protsesteri «biryńǵai tereze» arqyly qadaǵalanyp otyrǵanyn málim etti, dep habarlaidy QazAqparat.
«Memlekettik satyp alý – jemqorlyqqa batqan salalardyń biri. Memleketten bólingen orasan zor qarajat memlekettik tapsyrystardyń kómegimen igeriledi, sol sebepti agenttiktiń dál osy máselege erekshe nazar aýdarýy da zańdy. Biz satyp alýlardyń normativti-quqyqtyq bazalaryn ázirleýge, memlekettik satyp alý týraly zańnyń ózgertilýine belsendi túrde atsalysamyz. Qazir Memleket basshysynyń tapsyrmasymen kvazimemlekettik sektordaǵy tapsyrystardy qadaǵalaityn zań qabyldanyp jatyr», - dedi Oljas Bektenov.
Onyń aitýynsha, agenttik memlekettik satyp alýǵa árdaiym monitoring júrgizip otyr. Bul maqsatta «Atameken» Ulttyq kásipkerler palatasymen memorandýmǵa qol qoiylyp, «satyp alýdyń biryńǵai terezesi» qurylǵan. Onda barlyq memlekettik jáne kvazimemlekettik sektordyń, tabiǵat paidalanýshylar men ulttyq holdingterdiń málimetteri shoǵyrlandyrylǵan.
Memorandýmǵa sáikes, aimaqtarǵa agenttiktiń taldaýshylary aimaqtarda konkýrstardy kún saiyn baqylap otyratyn jumys oryndaryn qurǵan. «Satyp alýdyń biryńǵai terezesinde» baǵalardyń negizdiligin tekseretin qyzmet túri bar. Eger qandai da bir jemqorlyq qaýpi týyndasa, tapsyrys berýshige – taýarlar men qyzmetterge tapsyrys beretin memlekettik organǵa habarlama joldanady. Berilgen keńesten keiin baǵanyń orynsyz qoiylǵany nemese basqa da kemshilikter anyqtalsa, konkýrstyń qatysýshysy aýystyrylady.
«Ótken jyldyń jeltoqsan aiynan bastap biz belsendi túrde bul jumysty bastadyq. Bir jylǵa jýyq ýaqyttyń ishinde 16 mlrd teńgeniń tiimsiz paidalaný yqtimaldyǵynyń aldyn aldyq. Bul óte jaqsy nátije dep aitar edim. Qazan aiynyń ózinde 3 mlrd teńgeden astam qarajat boiynsha baǵanyń negizsiz ekenin dáleldedik. «Atameken» palatasymen birge bul jumysty jalǵastyramyz», - dedi Oljas Bektenov.
