QR Parlamenti Májilisiniń depýtaty Aidos Sarym Prezident Qasym-Jomart Toqaevtyń Sybailas jemqorlyqqa qarsy is-qimyl máseleleri jónindegi keńeste sóilegen sózi týraly pikir bildirdi, dep habarlaidy QazAqparat.
«Biz ár eki-úsh jyl saiyn tekserý júrgizemiz. Ár tekserý saiyn jemqorlardy qamap jatamyz. Jemqorlardy sottap taýysamyz degenshe sybailas jemqorlyq quramdas bóligin alyp tastaý kerek. Bul úshin osy saladaǵy sarapshylarmen, sýbsidiia alýshylarmen kóbirek sóilesý qajet. Bul sýbsidiia ǵana emes, búkil memlekettik satyp alý isine qatysty. Prezident problemalardy óte jaqsy biletinin kórsetti. Memleket basshysynyń bul máselege muqiiat daiyndalǵany kórinip tur. Eger biz memlekettik satyp alý júiesin ózgertý týraly aitatyn bolsaq, ony biýdjettik josparlaýdy durys jolǵa qoiýdan bastaý kerek. Bizde biýdjettiń ek problemasy bar. Bólingen qarjyny igermeý degen aýrý bar nemese baǵany jasandy túrde kóterýdi aitýǵa bolady», - dep atap ótti Májilis ókili.
Depýtattyń aitýynsha, bul máselede biýdjettik josparlaýmen ainalysatyndardyń jaýapkershiligne de bailanysty.
«Memlekettik satyp alý isinde birinshi basshylardyń tehnikalyq tapsyrmalardy qalyptastyrýdaǵy jaýapkershiligi zor. Biz naryqtyń bar ekenin umytpaýymyz kerek. Naryqta belgili bir kompaniialar, baǵalar bar ekenin túsinýimiz kerek. Memlekettik satyp alýlar biýdjet qarajatyn ashyq jumspa, meilinshe únemdeý úshin jasalady. Jekelegen múddeli tulǵalardyń satyp alýǵa degen qyzyǵýshylyǵyn salyq organdary nemese basqa da qurylymdar arqyly tejeý qajet. Jasyratyny joq, ainalymynda qomaqty qarajat bar kóptegen kompaniialardyń burynǵy qyzmetkerleri kásiporyn quryp, turaqty jetkizýshige ainalyp shyǵa keledi. Osy siiaqty ár túitkildi júieli túrde tarqatý kerek», - degen Aidos Sarym búginge deiin jemqorlyqty joiý úshin qabyldanǵan sheshimder jemisin beretinine senim bildirdi.
Condai-aq, ol búginge deiin «qol tigizýge bolmaityn» sala sanalyp kelgen sektorlarda tyńǵylyqty tekserý júrgizý kerektigin aitty.
«Eger osy iste sheshimtal áreketke bara alsaq, qoǵam men bilik arasynda senim ornatýǵa bolatyn bastapqy núkteni tapqan bolar edik. Sybailas jemqorlyqty túp-tamyrymen qurtqan bir de bir el joq ekeni túsinikti. Biraq ony barynsha azaitý bizdiń qolymyzda dep oilaimyn. Eń bastysy – bul kúreske jurttyń qalai atsalysatynynda. Sybailas jemqorlyq ózimizben betpe-bet kelse, kóz jumýǵa daiynbyz. Kóbimiz kezekti jyljytý siiaqty usaq-túiek sanalatyn máselelerde para berýden tartynbaimyz. Al dál sondai ózgelerdiń para berýi nemese alýy bizge zardap tigizse, basqasha sairap shyǵa kelemiz. Jemqorlyqpen alalap kúresý múmkin emes», - dep túiindedi Aidos Sarym.
