«Atameken» ulttyq kásipkerler palatasynyń basqarma tóraǵasynyń orynasary Erbol Óstemirov memlekettik satyp alý baǵalaryn ósirýde aldyńǵy oryndaǵy óńirlerdi atady, dep habarlaidy QazAqparat.
Erbol Óstemirov Sybailas jemqorlyqqa qarsy is-qimyl agenttigi men «Atameken» UKP-nyń jemqorlyqqa qarsy birlese kúres júrizý jumysynyń nátijesi týraly aita otyryp, palata ókili ártúrli organnyń memlekettik satyp alý baǵasyn ósirip jiberetin jaǵdailar kezdesetinin aitady.
«Óńirlerdegi málimetti keltirer bolsaq, ósirilgen baǵa boiynsha óńirlerdiń aldyńǵy qatarynda Mańǵystaý oblysy, ekinshi orynda Soltústik Qazaqstan, úshinshi orynda Atyraý oblysy tur. Tizimniń eń sońǵy oryndarynan Shymkent qalasyn, Túrkistan men Almaty oblysyn kórýge bolady», - deidi Erbol Óstemirov agentiktiń Facebook-tegi paraqshasynda bergen suhbatynda.
Onyń aitýyna qaraǵanda qazirgi júiede memlekettik satyp alýlardyń baǵasyn ósirýge múmkindik beretin qaýipter bar.
«Júie olardyń baǵany ósiretinin kórsetedi», - deidi Erbol Óstemirov.
Onyń aitýynsha, kei jaǵdaida memlekettik satyp alýdyń baǵasynyń ósirilgeni týraly kúdik-kúmán rastalmai jatady.
«Bizdegi júie bir ret bir kompiýterdiń baǵasy 1 mln teńgege satylyp alynǵanyn kórsetti. Birden kúmán týdyrarlyq jaǵdai. Sebebi biz kompiýterdiń ary ketse 200 myń teńgege shyǵatynyn bilemiz. Ary ketse 50 myń teńge qosylady. Keiin jaǵdaidy zertteý barysynda bul kompiýterlerdiń estý kemistigi bar adamdarǵa arnalǵanyn, olarǵa ózindik ereksheligi bar kompiýter kerektigin túsindik. Bul jaǵdaida máseleniń negizi bary aiqyndaldy», - dep qosty ol.
