QR Aqparat jáne kommýnikatsiialar ministri Dáýren Abaev vedomstvonyń keńeitilgen alqa otyrysynda atalǵan platforma jyl sońyna deiin qurylatynyn aitty.
«Búgingi kúni «Ashyq Úkimet» portalynda jariialanatyn derekterdiń sany artty. Mysaly, 2018 jyly portalda 150 jańa derek paida boldy. Endigi ýaqytta Astana turǵyndary portal arqyly qoǵamdyq kólikterdiń qozǵalysyn qadaǵalai alady. Halyqqa qyzmet kórsetý ortalyqtaryndaǵy kezekti baqylaýǵa da múmkindikteri bar. Sondai-aq, bala týý týraly memlekettik járdemaqyny alatyndardyń sany týraly aqparat ta qoljetimdi. Ekinshiden, azamattarǵa yńǵaily bolý úshin «Ashyq Úkimet» portaly árdaiym jańartylyp, ártúrli fýnktsiialar qosylyp turady. Máselen, memlekettik organnyń birinshi basshysynyń blogyna ótinishin nemese suraǵyn qaldyrǵan azamat ózine berilgen jaýapty pikir qaldyrý arqyly birden baǵalai alady. Iaǵni, memlekettik organdardyń reitingi olardyń azamattarǵa bergen jaýabynyń sapasyna sai saralanyp otyrady», - dedi Dáýren Abaev.
Ministrdiń aitýynsha, «Ashyq Úkimet» portalynyń mobildi jáne kózi nashar kóretin azamattarǵa arnalǵan qosymshalary da iske qosyldy. Búgingi kúni turǵyndar memlekettik organdardyń saittaryna qatysty túrli syni pikirler bildirip júr.
«Olar «keibir saittarda mańyzdy aqparat bolmaidy. Suraqtarǵa jaýap birkelki beriledi jáne úsh tildi kontentke yńǵaily derekter joq» deidi. Osy oraida ministrlik biryńǵai platforma qurýdy josparlap otyr. Bul azamattar úshin yńǵaily bolýy tiis. Iaǵni, memlekettik organdardyń saityna bir tetik arqyly kirýge múmkindik beriledi, mańyzdy aqparattyń jariialanýyn qamtamasyz etedi. Jyl sońyna deiin biz barlyq ortalyq memlekettik organdardy jáne jergilikti atqarýshy organdardy biryńǵai platformaǵa jumyldyrýdy josparlaimyz. Sonymen qatar, biyl «Ashyq aimaq» jobasyn júzege asyrmaqshymyz. Osylaisha, óz qyzmetterin ashyq júrgizip otyrǵan ákimder, ákimdikter anyqtalady. Úzdik dep tanylǵan ákimdikter barlyq aimaqtardyń nazaryna usynylady. Ákimdiktermen qatar máslihattardyń da qyzmetteriniń ashyqtyǵyn qamtamasyz etý mańyzdy. Bul qadam máslihattardyń «Ashyq dialog» portalynda óz blogtaryn ashý arqyly júzege asady», - dedi Abaev.
Buǵan qosa, vedomstvo basshysynyń málimetinshe, «Elektrondyq úkimet» portalyna 8 mln astam adam tirkelgen. 2018 jyly el turǵyndaryna 30 mln astam qyzmet túri elektrondyq formatta kórsetildi.
