Foto: Antikor
Memlekettik organdardyń basshylary jemqorlyq úshin sottaldy, dep habarlaidy "Ult aqparat" Sybailas jemqorlyqqa qarsy is-qimyl agenttigine silteme jasap.
"Astana qalasynyń qylmystyq ister jónindegi aýdanaralyq sotynyń úkimimen para alǵany úshin (QR QK 366-baby):
- Astana TJD basqarmasynyń bastyǵy B. Beisenqanov 5 jylǵa bas bostandyǵynan aiyrýǵa;
- qurylys basqarmasynyń basshysy A. Janǵaskanov 4,5 jylǵa bas bostandyǵynan aiyrýǵa;
- Ishki memlekettik aýdit departamenti basshysynyń orynbasary Ǵ. Aitjanova 60 million teńge aiyppulǵa;
- IMAD bas mamany A. Ábisheva 90 million teńge aiyppulǵa sottaldy.
Laýazymdyq ókilettikterin asyra paidalanǵany úshin (QR QK 361-baby) Astana qurylys basqarmasy basshysynyń orynbasary J. Myrzahmetov 4 jylǵa bas bostandyǵyn shekteý jazasyna kesildi" - delingen habarlamada.
Sondai-aq atalǵan adamdar memlekettik qyzmette qyzmet atqarý quqyǵynan ómir boiyna aiyrylǵan.
"TJD basqarma bastyǵy Qajymuqan Muńaitpasuly atyndaǵy Ortalyq stadion apatty dep taný týraly qujattamany keliskeni úshin qurylys kompaniiasy ókilinen 5 mln teńge somasynda para aldy degen kúdikke ilindi.
Basshynyń orynbasary jáne IMAD bas mamany aýditorlyq tekserý boiynsha oń qorytyndy úshin jeke kompaniia ókilderinen 2 mln teńge somasynda para aldy dep aiyptaldy.
Astana qalasy qurylys basqarmasynyń basshysy men onyń orynbasaryna laýazymdyq ókilettikterin asyra paidalanǵany úshin aiyp taǵyldy. Olar qurylys kompaniiasyn 21 mln teńgeden astam somaǵa materialdyq qundylyqtardy satyp alýǵa kóndirgen.
Sondai-aq, Qurylys basqarmasynyń basshysy jalpy qamqorlyǵy jáne memlekettik satyp alý sharttary boiynsha oryndalǵan jumystar aktilerine kedergisiz qol qoiǵany úshin JShS basshylyǵynan 400 myń teńge somasynda para aldy dep aiyptaldy" - delingen habarlamada.
Agenttik málimetinshe, osy úkimmen jeke qurylys kompaniiasynyń ókilderi joǵaryda atalǵan barlyq laýazymdy tulǵalarǵa para bergeni úshin jalpy somasy 500 mln teńgege jýyq aiyppul salýǵa sottalǵan.
QR QK 41-babyna sáikes aiyppul belgilengen merzimde tólenbegen jaǵdaida jaza sharasy bas bostandyǵynan aiyrýǵa aýystyrylady.
Sot úkimi zańdy kúshine engen joq.
