Búgin Májilistiń jalpy otyrysynda depýtattar «Qazaqstan Respýblikasynyń keibir zańnamalyq aktilerine memlekettik qyzmet máseleleri boiynsha ózgerister men tolyqtyrýlar engizý týraly» zań jobasyn maquldady, dep habarlaidy Baq.kz tilshisi.
Memlekettik qyzmet kadrlaryn tolyqtyrý tártibi qaita qaralmaqshy. Qazirgi ýaqytta bos oryndardy toltyrý úsh kezeńnen turatyn konkýrs arqyly júzege asady.
«Eń aldymen, úmitkerler bos laýazymdary bar memlekettik organ qyzmetkerleri arasynan irikteledi. Eger olardyń ishinde úmitker bolmaǵan jaǵdaida, irikteý barlyq organdar qyzmetkerleriniń arasynda jalǵastyrylady. Osy kezeńde de jeńimpaz anyqtalmasa, onda jalpy konkýrs jariialanady. Jyl basynan qoldanysqa engen zańdy taldaý kórsetkendei, jalpy konkýrsqa qatysýshylar sany eki esedei kóp bolyp otyr. Sondyqtan bos laýazymdardyń 65 paiyzy osy kezeńniń qorytyndysy boiynsha toltyrylýda. Qazirgi tańda konkýrstar qatań túrde úsh kezeńde ótkizilýde. Sol sebepten bos laýazymdarǵa úmitkerledi irikteý 16-dan 52 jumys kúnine deiin ýaqyt alýda», - dep baiandady Memlekettik qyzmet isteri jáne sybailas jemqorlyqqa qarsy is-qimyl agenttiginiń tóraǵasy Qairat Qojamjarov.
Onyń aitýynsha, bul kadr tapshylyǵyna ákelgen. Ásirese, aýyldyq jáne aýdandyq deńgeide kadr jetispeýshiligi anyq baiqalyp otyr. Al ishki jáne jalpy konkýrstardy biriktirý bul máseleni sheshýge múmkindik beredi.
«Bos oryndardy toltyrý máselesin tezdetýmen qatar, meritokratiia qaǵidalaryn saqtalýyn baqylaityn bolamyz. Sol sebepti ekinshi ishki konkýrstar ótkizilmeitin jaǵdailar zańǵa táýeldi quqyqtyq aktilerinde anyqtalatyn bolady. Olar - sirek kezdesetin mamandyqtar jáne basshylyq emes laýazymdar. Kerisinshe barlyq basshylyq laýazymdarǵa ekinshi konkýrsty ótkizý mindetti túrde saqtalady. Bundai tásil tómennen joǵary ósýdi, iaǵni mansaptyq qaǵidanyń talaptaryn oryndaýdy tolyq qamtamasyz etedi», - deidi ol.
Budan bólek, «A» korpýsy qyzmetkerleriniń «B» korpýsy laýazymdaryna taǵaiyndalý tártibi jeńildetilmek. Qazirgi ýaqytta «A» korpýsynyń qyzmetkerlerin tómengi orynǵa taǵaiyndaý tek kadr saiasaty jónindegi ulttyq komissiianyń sheshimimen ǵana júzege asyrylady. Zań jobasynda mundai quqyqty agenttikke berý usynylyp otyr. Búgingi kúngi mundai tájiribe «B» korpýsynyń qyzmetkerlerin aýystyrý kezinde qoldanylyp keledi.
«Qazirgi tańda «B» korpýsyna qaraǵanda «A» korpýsynyń úmitkerlerine naqty bir mamandyqqa sáikes kelý týraly talap qoiylmaidy. Al «B» korpýsy úmitkerlerine biliminiń, mamandyǵynyń sáikes kelýi mindetti talap. Sol sebepti «A» korpýsynyń qyzmetkerleri de zerdeleýge jatatyn bolady. Bul talap Elbasynyń memlekettik apparatty kásibilendirý boiynsha tapsyrmalarynan týyndaidy», - dedi Q.Qojamjarov.
Sondai-aq quqyq qorǵaý qyzmetine úmitker tulǵalardyń zańdardy bilý jáne jeke qasietterin baǵalaýǵa arnalǵan testileýden ótý merzimi aýystyrylady. Qoldanystaǵy zańǵa sáikes bundai talap kelesi jyldyń birinshi qańtarynan bastap iske asyrylýy tiis edi. Alaida Memleket basshysy bul júieni biylǵy jyly engizýdi tapsyrdy.
