Prezidenttiń kadr rezervine engen elordalyq jas kásipker Bekjan Álimqulov ne úshin memlekettik qyzmette eńbek etýge nietti ekenin aityp berdi, dep habarlaidy QazAqparat.
«4-5 jyldan beri óz kásibimdi dóńgeletip kelemin. Odan buryn iri kompaniialarda zańger bolyp jumys istedim. Elordada beton óndiretin zaýyttyń basshysymyn. Nur-Sultanda tóselgen 200 myń sharshy metrden astam tas tósenish bizdiń zaýyttan shyqqan. Osy ýaqytqa deiin memleketke 40 mln teńgeden astam salyq tólep úlgerdik», - deidi jas kásipker.
Kásibin násip etken Bekjan Álimqulovtyń Prezidenttiń kadr rezervine tapsyrýynyń óz sebebi bar eken. «Kásipkermin» dep ózin tar sheńberge qamaǵysy kelmeitin kórinedi.
«Kásipkerlikke qaraǵanda memlekettik qyzmette halyqqa kóbirek paidam tier bolsa, nege eńbek etpeske? Belsendi bolǵym keledi. Sol sebepti Prezidentimiz sailaýaldy baǵdarlamasynda «eń aldymen jastardy úlken laýazymdarǵa tartý kerek» degennen keiin osy jobaǵa keldim. Álbette, áý basta 300 azamattyń irikteletinin estip, ózimniń sol qatarda bolatynyma nyq senimdi boldym. Alaida kadrlyq rezervke 13 myń adamnyń tapsyrǵanyn estigende úmitim úzile bastaǵan edi. Aqyry, synnan súrinbei ótkenimdi estip, qýandym», - deidi ol.
Jas kásipker qazirgi ýaqytta ártúrli memlekettik organnan usynys túsip jatqanyn aitady. Ázirge tehnikalyq ta, gýmanitarlyq ta bilimi bar (Almatydaǵy Súleimen Demirel atyndaǵy ýniversitettiń «aqparattyq júieler» mamandyǵy men Nur-Sultandaǵy L.Gýmilev atyndaǵy EUÝ «zańger» mamandyǵy) Bekjan usynystardyń bárin saralap kórmek.
«Estýimshe, kadrlyq rezervke ótkenderdiń ishinde 55 adam qazirdiń ózinde qyzmetke ornalasqan. Qatarlastarym úshin qýanyshtymyn. Sebebi, olar úshin bul – progress, shyn máninde áleýmettik lift. Keleshekte Qazaqstannyń óndiris salasyna qatysty nemese kásipkerlerge kómektese alatyn, aǵylshynsha aitqanda «design maker» sipatyndaǵy, iaǵni ózgeris engize alatyn qyzmet tiip jatsa, qýana qabyldaimyn», - deidi ol.
Eske sala ketsek, keshe Aqordada Memleket basshysy Qasym-Jomart Toqaev Prezidenttiń kadr rezervine engen 300 jaspen kezdesý ótkizgen bolatyn. Jiynda Qasym-Jomart Toqaev el jastaryna úndeý joldady.
