Memlekettik qyzmetshilerge jalaqy tóleý júiesin ózgertý kerek.
Mundai pikirdi Qarjy ministrligindegi «Adaldyq alańy» jobalyq keńsesiniń basshysy Oljas Qudaibergenov bildirdi, dep habarlaidy QazAqparat.
«Memlekettik qyzmetshilerge jalaqy tóleýge qatysty problemanyń eki qyry bar. Birinshisi - bul sheneýnikter sany qajetti kórsetkishten artyq. Aitalyq, 2011 jyly memlekettik qyzmetshiler sany 65 myń bolsa, qazir shamamen 98 myń adamǵa jetip jyǵylady. Iaǵni, 9 jyldyń ishinde 50 paiyzǵa jýyq kóbeiip otyr. Ósim kúshtik memlekettik qyzmetshilerdiń bir bóliginiń ákimshilik azamattyq memleketti qyzmetshiler sanatyna aýystyrylýymen túsindiriledi. Árine, artyq laýazymdardy alyp tastaý arqyly memlekettik qyzmetshiler sanyn qysqartý da qajet. Problemanyń ekinshi qyry – jalaqy tóleý», - dedi ol.
Osy rette ol QR Prezidenti Qasym-Jomart Toqaev memlekettik apparaty jańartý týraly aitqanyn, sonyń aiasynda jalaqy tóleý júiesin ózgertip, memlekettik apparatty da barynsha jańǵyrtý qajettigin basa aitty. Memlekettik qyzmetshiler jalaqysynyń tómen bolýy jemqorlyq problemasyna túrtki bolýy yqtimal ekendigin de atap ótti.
«Jalaqy tóleý jaiynda sóz qozǵaǵanda olardyń eńbekaqysy tómen ekendigini baiqaimyz. Osy kemshilikti joiý qajet. Jaǵdai ózgere bastaǵan kezde kóptegen oń jaitty baiqaityn bolamyz. Qarjy bólý nemese jeńildikter men materialdyq yntalandyrý usynýǵa qatysty sheshimderdi vitse-ministr, ákim, ákimniń orynbasary deńgeiinde qabyldaityndai jasaǵanymyz jón bolar edi», - dedi Oljas Qudaibergenov.
