Memlekettik qyzmetshilerge smartfon paidalaný múmkindigin berý – tsifrlyq dáýir talaby. Bul pikirdi QR Memlekettik qyzmet isteri agenttigi tóraǵasynyń orynbasary Darhan Jazyqbaev aitty, dep habarlaidy QazAqparat.
«Búginde Qazaqstandaǵy memlekettik qyzmetshilerdiń ortasha jasy – 38. Sondai-aq, memlekettik qyzmetshilerdiń ortasha eńbek ótili – 10 jyl. Iaǵni, bul tsifrlyq órkeniet jetistikterin meńgerýge tolyq múmkindik beredi degen sóz. Memlekettik qyzmetshilerdiń basym kópshiligi jańa tehnologiialardy óz jumystarynda erkin paidalana alatynyn nyq senimmen aitýǵa bolady», - dedi Agenttik ókili astanada ótken «Tsifrlyq órkeniet dáýirinde memleket pen qoǵamnyń transformatsiialanýyndaǵy Konstitýtsiianyń róli» dóńgelek ústelinde.
Onyń aitýynsha, qoǵammen keri bailanys jasaý úshin smartfondardyń qyzmeti aitarlyqtai qajet. Memlekettik qyzmet týraly zańnyń 4-babynyń 15-tarmaǵynda «Memlekettik qyzmet qoǵamdyq pikir men jariialylyqty eskerý qaǵidalaryna negizdeledi» dep kórsetilgen.
«El Prezidenti Qasym-Jomart Toqaev «Biz úshin halyqtyń áleýmettik jaǵdaiyn bilý jáne der kezinde áreket etý óte mańyzdy», dedi. Iaǵni, ákimder halyqtyń suranysyna jedel den qoiyp, áleýmettik jelilerde belsendi jumys isteýdiń mańyzdylyǵyn atap ótken edi. Memlekettik qyzmetshilerdiń áleýmettik jelilerdi paidalanýy – búgingi zamannyń suranysyna ainalyp otyr. Demek memlekettik qyzmetshilerge óz qyzmetinde aqparattyq qaýipsizdik máselesine jaýapkershilikti jeke moinyna ala otyryp, smartfon paidalaný múmkindigin berýdi tsifrlyq dáýirdiń talaby dep oilaimyn», - dedi Darhan Jazyqbaev.
