Foto: canva.com
Qazaqstan Respýblikasy Úkimetiniń 2001 jyldyń 29 tamyzyndaǵy №1127 qaýlysyna sáikes memlekettik qyzmetkerlerge syiaqy tóleý, materialdyq kómek kórsetý, laýazymyna qarai ústemeaqylar belgileý biýdjet qarajatyn únemdeý esebinen ǵana júzege asyrylady, dep habarlaidy «Ult aqparat» vedomstvonyń baspasóz qyzmetine silteme jasap.
Ministrliktiń málimetinshe, atalǵan qaýly arqyly shyǵys baptarynyń naqty tizbesi aiqyndalǵan. Olardyń esebinen únemdeý qalyptasqan jaǵdaida ǵana syiaqy tólenýi múmkin (issaparlarǵa, kommýnaldy jáne kólik qyzmetterine, bailanys qyzmetterine, úi-jailardy jalǵa alýǵa jáne t.b. shyǵystar boiynsha únemdeý).
"Búginde atalǵan qaýlyǵa, sondai-aq basqa da zańnamalyq aktilerge syiaqylardy shekteitin ózgerister engizilmegendikten memlekettik qyzmetkerlerge syiaqylardy berýge tyiym salatyndai negiz joq. Qarjy ministrliginiń osyǵan deiingi habarlamasynda Úkimet qaýlysynyń normalaryn buljytpai ustaný qajettigi jáne baǵdarlama ákimshileriniń qyzmetkerlerdi tizbede kórsetilgenderden bólek biýdjettik baptardan qarajatty syiaqyǵa paidalanýǵa jol bermeý týraly aitylǵan bolatyn. Investitsiialyq jobalardy iske asyrýdan jáne memlekettik apparattyń jumysyna áser etpeitin materialdyq aktivterdi satyp alýdan únemdelgen qarajat biýdjetke qaitarylýǵa tiis", – delingen habarlamada.
