Memlekettik qyzmet isteri jáne sybailas jemqorlyqqa qarsy kúres agenttiginde memlekettik qyzmetshiler áleýmettik jelidegi jariialanymdary tekseriletinin xabarlady. Bul týraly QazAqparat jazdy.
"Etika kodeksinde memlekettik qyzmetshiler qoǵamnyń synyn týǵyzýǵa jol bermeýi shart delingen. Bizdiń kózqarasymyz boiynsha, memlekettik qyzmetshilerdiń áleýmettik jelilerinde memlekettik qyzmettiń bedeline nuqsan keltiretin foto, beinematerialdardyń jariialanýy bizdiń iske kirisýimizge jáne ol jariialanymdy óshirýge nemese kópshilik nazarynan alyp tastaýyn suraýymyzǵa negiz bola alady", - dedi memlekettik qyzmet salasyndaǵy baqylaý departamentiniń basshysy Qýanysh Japaqov.
Departament basshysynyń aitýynsha, ondai jazbalarǵa memlekettik qyzmetshilerdiń túrli keshterdegi nemese ózge de oryndardaǵy ádepsiz, mas kúiindegi, kalian jáne ózge de tyiym salynǵan zattardy tutyný kezindegi foto jáne beinetúsirilimderi jatady. Sonymen qatar destrýktivti dini aǵym aqparattary bar jazbalarǵa "laik" basý memlekettik qyzmetshiniń tártiptik jazaǵa tartylýyna ákep soqtyrýy múmkin.
"Mysalǵa, naýryz aiynda memlekettik organdarǵa monitoring jasaldy. Onyń barysynda investitsiialar jáne damý ministrliginiń, qorǵanys jáne áýeǵarysh ónerkásibi ministrliginiń birqatar qyzmetkerleriniń akkaýnttarynan memlekettik qyzmettiń bedelin túsiretin jekelegen materialdar anyqtaldy. Bul jazbalardy óshirýge jáne atalmysh materialdardy jariialaǵan qyzmetkerlerdiń isin tártiptik komissiiada qaraý jóninde málimetter joldandy. Sáýirde jergilikti atqarýshy organ qyzmetkerleriniń akkaýnttaryna monitoring júrgizilýde", - dedi ol.
