Keshe Májilis Tóraǵasy Nurlan Nyǵmatýlinniń tóraǵalyǵymen palatanyń kezekti jalpy otyrysy bolyp, onda kún tártibine sáikes úsh másele qaraldy.
Solardyń ishinde keibir zańnamalyq aktilerge memlekettik qyzmet máseleleri boiynsha ózgerister men tolyqtyrýlar engizý týraly zań jobasy kóbirek talqylanyp, baiandama jasaǵan Memlekettik qyzmet isteri jáne sybailas jemqorlyqqa qarsy is-qimyl agenttiginiń tóraǵasy Qairat Qojamjarovqa depýtattar birneshe suraq qoidy.
Zań jobasynyń ózi Elbasynyń ústimizdegi jylǵy 14 maýsymda jáne Ulttyq komissiianyń 15 sáýirde bergen tapsyrmalarynyń negizinde daiyndalǵan. Ol azamattardyń memlekettik qyzmetke túsý tártibin jetildirip, quqyq qorǵaý jáne memlekettik qyzmet standarttaryn jaqyndatady. Q.Qojamjarovtyń aitýyna qaraǵanda, zań jobasy qoǵamda keńinen talqylanǵan.
Sonymen túzetýler qandai degen suraqqa jaýap beretin bolsaq, onda birinshiden, memlekettik qyzmettiń bos oryndaryn tolyqtyrý qaita qaralady. Qazirgi kezde ol úsh kezeńnen turatyn konkýrs arqyly júzege asyrylady. Oǵan 16-dan 52 kúnge deiin ýaqyt ketip, memlekettik qyzmet orny kóp merzimge bos turady. Osynyń ózi kadr tapshylyǵyna ákelýde, dedi sheshen. Ásirese, aýyldyq jáne aýdandyq deńgeilerde kadr jetispeýshiligi aiqyn baiqalýda eken. Zań jobasy osyndai olqylyqtardy boldyrmas úshin ishki jáne jalpy konkýrstardy biriktirýdi kózdep otyr. Sóitip, bos oryndardy tezirek tolyqtyrýǵa qol jetkiziledi, sonymen qatar meritokratiia qaǵidattary saqtalatyn bolady, dedi Q.Qojamjarov.
Sondai-aq, «A» korpýsy qyzmetkerlerin «V» korpýsy laýazymdaryna taǵaiyndaý tártibi jeńildetiledi. Qazir «A» korpýsynyń qyzmetkerlerin tómengi oryndarǵa taǵaiyndaý tek kadr saiasaty jónindegi ulttyq komissiianyń sheshimimen ǵana júzege asyrylsa, endi zań jobasy osy quqyqty agenttikke berýdi usynǵan.
Úshinshi basty ózgeris quqyq qorǵaý qyzmetine úmitker tulǵalarǵa arnalypty. Zań jobasy olardyń zańdardy bilý jáne jeke basynyń qasietterin baǵalaýǵa arnalǵan testileýden ótý merzimin aýystyrýdy kózdegen. Qoldanystaǵy zańǵa sáikes mundai talap kelesi jyldyń birinshi qańtarynan bastap engiziletindigi belgilengen. Alaida, Memleket basshysy bul júieni biyldan bastap engizý jóninde tapsyrma beripti. Mine, osy jáne basqa da ózgerister týraly baiandaǵan Q.Qojamjarovqa birinshi suraqty depýtat Amangeldi Dáýrenbaev qoidy. Ol quqyq qorǵaý organdarynyń bos laýazymdaryna úmitker bolatyn tulǵalardy testileý úshin agenttikte tiisti baza bar ma jáne bul is biýdjetten qosymsha qarajat talap etpei me dep surady. Onyń suraǵyna jaýap bere kelip Q.Qojamjarov quqyq qorǵaý organdaryndaǵy bos oryndarǵa jylyna 37 myńdai úmitker kelip, testileýden ótetinin jáne agenttiktiń bazasy osy isti atqarýǵa jetkilikti ekenin jetkizdi.
Depýtat Pavel Kazantsev meritokratiia qaǵidatynyń saqtalýyna engiziletin ózgerister kedergi keltirmei me dep surady. Oǵan Q.Qojamjarov konkýrstyq protsedýralardy ońtailandyrý meritokratiia qaǵidattarynyń saqtalýyna kedergi keltirmeitindigin kóldeneń tartty.
Depýtat Serik Seidýmanov basshylyq laýazymdarǵa taǵaiyndalǵan tulǵalardyń komandasymen kelý máselesi halyq arasynda narazylyq týdyratynyn eske sala kelip, kareralyq modelge aýysqannan beri memlekettik basshy qyzmetkerlerdiń komandasymen oryn aýystyrýy azaidy ma dep surady. Oǵan Q.Qojamjarov konkýrssyz taǵaiyndaýlardyń 25 ese azaiǵanyn aita kelip, osynyń arqasynda birinshi basshylar arasynda komandasymen aýysyp júrý isi azaiyp kele jatqany baiqalatynyn jetkizdi.
Zań jobasy jóninde qosymsha baiandamany Halyqaralyq ister, qorǵanys jáne qaýipsizdik komitetiniń múshesi Ersultan Bekturǵanov jasady. Shaǵyn talqylaýdan keiin zań jobasy tolyqtai maquldandy.
Osy kúni TMD-ǵa qatysýshy memleketterdiń tótenshe oqiǵalardyń aldyn alý jáne joiý salasyndaǵy yntymaqtastyǵy týraly kelisimdi ratifikatsiialaityn zań jobasy da maquldandy. Zań jobasy týraly baiandamany Ishki ister ministri Q.Qasymov jasady.
Al keibir zańnamalyq aktilerge ekologiialyq máseleler boiynsha ózgerister men tolyqtyrýlar engizý týraly zań jobasy boiynsha qorytyndy ázirleýge ýaqyt belgilendi.
Jaqsybai SAMRAT,
«Egemen Qazaqstan»
.jpeg)