Azamattyq kelisimshart jasasqan jeke tulǵalar men qyzmetkerler úshin (2018 jáne 2020 jyldarǵa deiingi retrospektivti) mindetti zeinetaqy tólemderi (MZT) úshin aýdarymdardy jáne mindetti meditsinalyq saqtandyrýǵa jarnalardy qoldaný kezinde kúshine engen normalar qate bolyp eseptelmeidi. Bul týraly QR Qarjy ministrligi Memlekettik kirister komitetinen málim etti, dep habarlaidy "Ult aqparat".
«Bul normalar zań shyǵarý jumysynyń kezeńinde qarastyrylǵan jáne QR Ulttyq ekonomika ministrligi men QR Parlamentiniń resmi saittarynda, Elektrondyq úkimet portalynda ornalastyrylǵan. Sol ýaqytta usynylǵan ózgerister biznes qaýymdastyǵymen birlese talqylandy», - dedi Memlekettik kirister komiteti.
Vedomstvo sondai-aq 2018 jyldyń shildesinen bastap MZT tólemi azamattyq-quqyqtyq kelisimshart negizinde jumys isteitin jeke tulǵanyń mindeti bolǵanyn jáne tek 2019 jyldan bastap mundai tólem salyq agentiniń mindeti bolyp tabylatyndyǵyn eske saldy.
Tiisinshe, eger 2018 jyldyń ekinshi jartyjyldyǵynda MZT-ny jeke tulǵa óz betinshe tólemegen bolsa, jeke tabys salyǵyn (JTS) qaita esepteý talap etilmeidi jáne JTS boiynsha 2018 jylǵy salyq eseptiligine túzetýler engizýdiń qajeti joq.
«Osyny eskere otyryp, salyq agentteri salyq eseptiligin qaita esepteýge jáne ózgertýge jetkilikti ýaqyt bólingen. Sonymen birge, salyq eseptiligi nysanyn 2021 jyldyń naýryzyna deiin qaita esepteý jáne usyný qajettiligi týraly taratylǵan aqparat shyndyqqa sáikes kelmeitini atap ótiledi», - dedi komitetten.
Aita keteiik, 2018 jyly mindetti zeinetaqy tólemderin ózdiginen tólegen, JTS somasy qaita esepteýge jatatyndar sany MZT tóleýshileriniń 0,1%-nan az.
«Bul rette salyq agenti qosymsha salyq eseptiligin usynýǵa quqyly. Bul jaǵdaida tólengen JTS somasyn qaitarý týraly másele salyq agentine artyq tólengen salyq somasyn qaitarý týraly ótinish bergen kezde qaralady.
Máselen, memlekettik qyzmetterdi ońtailandyrý maqsatynda 2021 jyldan bastap salyqtyń artyq tólengen somasyn esepke jatqyzý men qaitarý merzimi on kúnnen bes jumys kúnine deiin qysqartyldy. Sondai artyq tólengen somany aldaǵy tólemder esebine qaldyrý múmkindigi qarastyrylǵan.
Memlekettik kirister komiteti JTS boiynsha deklaratsiialardy usyný táýekelderdi basqarý júiesin baǵalaýǵa áser etpeitindigin eskertedi, óitkeni TBJ qoldaný kriteriileri «JTS boiynsha birneshe ret ózgertýdi engizý» kriteriiin qamtymaidy.
TBJ-ni baǵalaýǵa áser etetin deklaratsiialardy usynýǵa qatysty, «buryn usynylǵan salyq eseptiligine birneshe ret engizilgen ózgerister men tolyqtyrýlar» kriteriii qupiia aqparat bolyp tabylmaidy, bul biznes-qaýymdastyq úshin osy kriterii sipattamalarynyń ashyqtyǵyn jáne qoljetimdiligin rastaidy.
Bul kriterii salyq tóleýshi jalpy somasy 10 (on) million teńgeden asatyn korporativti tabys salyǵyn jáne (nemese) qosymsha qun salyǵyn azaitý úshin 5-ten astam qosymsha deklaratsiia tapsyrǵan jaǵdaida ǵana qoldanylady.
Sondai-aq, JTS úshin qosymsha salyq eseptiligin usyný býhgalterlerdiń jaýapkershilikterine ákep soqtyrmaidy», - dedi komitetten.
