QR Qarjy ministrligi Memlekettik kirister komiteti jeke jáne zańdy tulǵalarǵa elektrondy salyq tóleýshi retinde tirkelý kiltin berý rásimin toqtatty, dep habarlaidy "Ult aqparat" vedomstvoǵa silteme jasap.
«Qazaqstandyqtar Ulttyq kýálandyrýshy ortalyqtyń elektrondy tsifrly qoltańbasyn «Elektrondy Úkimet» portalynan nemese turǵylyqty mekenjaiy boiynsha halyqqa qyzmet kórsetý ortalyqtarynan alady. Al buǵan deiin berilgen QR QM MKK elektrondy salyq tóleýshi retinde tirkelý kilti jaramsyz dep tanylady», delingen habarlamada.
QR Ulttyq kýálandyrýshy ortalyǵy jeke tulǵalarǵa, zańdy tulǵalarǵa, QR rezidenti emes tulǵalarǵa elektrondy tsifrly qoltańba men SSL tehnikalyq sertifikatyn beredi. Aita keteiik, ETsQ barlyq memlekettik qyzmetkerlerge tabysy men múlki deklaratsiiasyn tapsyrý úshin qajet.
2020 jyldyń 1 qańtaryna deiin 619 295 zańdy jáne jeke tulǵada memlekettik kirister organdarynyń elektrondy salyq tóleýshi retinde tirkelý kilti bolǵan.
