Memlekettik hatshynyń Qyzylordaǵa sapary Nazarbaev ziiatkerlik mektebinde jalǵasty. Onda aldymen oblystyq bilim basqarmasynyń basshysy Maira Meldebekova salanyń damý barysy týraly baiandady.
Búginde aimaqta 655 balabaqsha tirkelgen bolsa, sonyń 396-sy nemese 71%-i memleket pen jekemenshik áriptestigi aiasynda jumys istep tur. 2015 jyly 3 jáne 6 jas aralyǵyndaǵy búldirshinderdi mektepke deiingi tárbiemen tolyq qamti otyryp, Qyzylorda oblysy «Balapan» baǵdarlamasyn merziminen buryn oryndady. Biyl tuńǵysh ret sábidi úiden shyqpai-aq balabaqsha kezegine qoiýǵa, kezektiń jyljýyn qadaǵalaýǵa, qyzmet aqysyn elektrondy júie arqyly tóleýge múmkindik beretin «Elektrondy balabaqsha» júiesi iske qosyldy.
– Jalaǵash aýdanynyń Shámenov aýylyndaǵy biyl apatty dep tanylǵan mektepten basqa oblysta apatty jaǵdaidaǵy mektepter joq. Úsh aýysymdy bilim berý máselesi oń sheshimin tapty. Bilim salasyn tsifrlandyrý jumysy qarqyndy júrip jatyr, – dedi Maira Meldebekova.
Robototehnika, kompiýterlerdi baǵdarlamalaý syndy kúrdeli isterdi erkin meńgergen balalardyń bir shoǵyry Nazarbaev ziiatkerlik mektebinde bilim alýda. Óitkeni, olar tsifrlandyrý zamanynda munyń qanshalyqty mańyzdy ekenin jaqsy túsinedi. Bilim oshaǵyndaǵy nanotehnologiia, biotehnologiia kabinetteri olardyń ózderin qyzyqtyrǵan ǵylym salalarymen ainalysýy úshin yńǵaily etip jabdyqtalǵan.
Memlekettik hatshy Gúlshara Ábdiqalyqova, oblys ákimi Qyrymbek Kósherbaev bastaǵan qonaqtarǵa oqýshylar qyzyqty tájiribelerin, zerthana múmkinshilikterin kórsetti. Nanotehnologiia kabinetinde, mysaly, balalar órt sóndirý, kriminalistika, meditsina salalarynda qoldanylatyn jańalyqtardy oilap tapsa, biotehnologiia kabinetinde DNK tizbegin anyqtaý, túrli jasandy jolmen ulpa ósirý joldaryn, mikrobiologiialyq sintezderdi zerttegen.
Odan bólek, daryndy oqýshylar qolóner buiymdarynyń kórmesin nazarǵa usyndy. Al qaladaǵy mańdaialdy bilim oryndarynda oqityn izdenimpaz órender – IT, robototehnika, himiia, biologiia, tarih pánderi boiynsha halyqaralyq, respýblikalyq olimpiadalardyń jeńimpazdary ózderiniń jetistikterin tanystyrdy. Aimaqty kógaldandyrý, týrizmdi damytý, tsifrlyq tehnologiia salasyn órkendetýge qatysty ideialarymen bólisti.
Nazarbaev Ziiatkerlik mektebiniń direktory Baqyt Jumataidyń aitýynsha, qazir munda 700-ge jýyq bala bar. Olarǵa otandastarymyzdan bólek, kanadalyq, filippindik, ýgandalyq, keniialyq mamandar dáris beredi. Kúni búginge deiin mektepten halyqaralyq, respýblikalyq pándik olimpiadalardyń 70-ten astam júldegeri, robototehnika baiqaýlarynyń 20 shaqty jeńimpazy túlep ushty.
Byltyr ujym halyqaralyq mektepter keńesiniń akkreditatsiiasynan sátti ótip, bilim sapasyn dáleldedi. Biyl Ulybritaniia ulttyq ortalyǵy Nazarbaev Ziiatkerlik mektepteriniń NIS-Programme bilim baǵdarlamasyn General Certificate of Education A-Level deńgeiine sáikestigin rastady.
– Bul túlekterimizdiń elimizdegi 10 bedeldi joǵary oqý ornynyń 2-kýrsyna birden, al Germaniiadaǵy ýniversitetterge ýniversitetaldy daiyndyq kýrsyna qatyspastan oqýǵa qabyldanýyna múmkindik beredi. Jáne bir jetistigimiz, biyl 132 túlek túgel joǵary oqý oryndaryna túsip, 8 memlekettiń bilim granttaryn ielendi, – dedi mektep basshysy.
***
Jumys sapary barysynda Qazaqstan Respýblikasynyń Memlekettik hatshysy Gúlshara Ábdiqalyqova «Dostyq úiinde» bolyp, jumysymen tanysty.
Aita ketý kerek, 2015 jyly tatýlyqtyń temirqazyǵyna ainalǵan, Elbasynyń bastamasymen qurylǵan Qazaqstan halqy Assambleiasynyń 20 jyldyǵyna orai ashylǵan nysan burynǵy Y.Altynsarin atyndaǵy kinoteatr ǵimaratynda ornalasty. Ǵimaratta 230 orynǵa arnalǵan kontsert zaly, májilis zaly bar. Sondai-aq, óńirdegi 11 etno-mádeni ortalyq, Assambleianyń ardagerler men analar keńesi osynda qonystanǵan. Bul ortalyqtar óz elderiniń mádenieti men dástúrin jańǵyrtyp, eldiń saiasi ómirine de belsene aralasady.
Gúlshara Ábdiqalyqova mundaǵy muraijaimen tanysty jáne Astana qalasynyń – 20, Qyzylorda qalasynyń 200 jyldyǵyna arnaiy uiymdastyrylǵan fotokórmeni tamashalady. Sonymen qatar kontsert, májilis zaldaryn, kitaphanany kórdi.
Dál sol kúni «Dostyq úiinde» ashyq esik kúni ótip jatty. QR Assambleiasy oblystyq hatshylyǵynyń meńgerýshisi Láila Tóreshovanyń aitýynsha, shara Qyzylorda qalasynyń 200 jyldyǵyna orai uiymdastyrylǵan.
Sharaǵa mektep oqýshylary, Assambleia qurylymdarynyń músheleri qatysýda. Olar murajaimen, arnaiy jasaqtalǵan fotokórme jumysymen tanysty. Bizde «1000 bala» atty mádeni-aǵartýshylyq joba jumys jasaidy. Ol boiynsha 4 aralas mekteptiń 4-7 synyp oqýshylary memlekettik tildi úirenedi. Búgin sol balalar «100 jańa esim» jobasynyń jeńimpazy Symbat Ábdirahmanovanyń «Siqyrly kilt» animatsiialyq filmin tamashalaýda,– dedi ol.
QR Memlekettik hatshysy Gúlshara Ábdiqalyqova assambleia jumysyna sáttilik tiledi.
