QR Memlekettik hatshysy Qyrymbek Kósherbaev elimizdegi sport mektepteri men úiirmeleriniń jumysyna taldaý jasap, sportty qoldaýdyń keshendi josparyn qurýdy usyndy, dep habarlaidy QazAqparat.
«Búginde eldiń bárinde endi ne isteý kerek degen suraq týyndap jatyr. Eń aldymen balalar men jasóspirimderdiń dene shynyqtyrý jáne sportpen ainalysýyn qamtamasyz etýimiz qajet. Óskeleń urpaqtyń sportpen shuǵyldanyýyna jaǵdai jasamai, iri jarystarda jeńiske jetemiz deý ábestik. Sondyqtan elimizdiń barlyq aimaqtaryndaǵy sport mektepteri men úiirmeleriniń jaǵdaiyna tereń taldaý jasalyp, olardy qoldaýdyń keshendi jospary jasalýy tiis. Ondaǵy jumysty júielep, qur esep pen bos kórsetkishke emes naqty nátijege eńbektengen jón. Halyqtyń salaýatty ómir saltyn ustanyp, buqaralyq sportpen ainalysýyn damytqan durys», - dedi Kósherbaev.
Sondai-aq, Memlekettik hatshy sportpen shuǵyldanatyn halyqtyń sany artsa, tiisinshe sapanyń da jaqsaratynyn aitty.
«Al sapa bizdiń Aziia, álem birinshilikteri men Olimpiadada máreniń aldynan kelip, kók bairaǵymyzdyń jelbireýine yqpal etedi. Bul kezek kúttirmei jedel qolǵa alatyn sharýa. Osy rette Prezident buqaralyq jáne balalar sportyn damytýǵa kóńil bólip, sol arqyly álemdik arenada úlken tabystarǵa qol jetkizýge umtylý qajet dep tapsyrdy. Sporttaǵy reforma Memleket basshysy aldymyzǵa qoiǵan osyndai mindetten bastalýy qajet. Tokio tórindegi qatelikterimizdi túzep, súringen tusymyzdan sabaq alyp, aldaǵy halyqaralyq iri jarystarda, Parij Olimpiadasynda Qazaqstannyń sporttyq derjava ekenin tanytý - aldymyzdaǵy basty mindet», - deidi ol.
Aita ketsek, búgin elordada QR Memlekettik hatshysy Qyrymbek Kósherbaev Tokio-2020 Olimpiadasynyń jeńimpazdaryn jeńisimen quttyqtap, QR Prezidenti Qasym-Jomart Toqaevtyń atynan birqatar memlekettik nagradalardy tabystady.
