Qazaqstan Respýblikasynyń Memlekettik hatshysy Qyrymbek Kósherbaev «Rýhani jańǵyrý» baǵdarlamasyn iske asyrý sheńberinde naqty tapsyrmalar berdi, dep habarlaidy QazAqparat.
«Májiliste usynylǵan is-sharalar josparynyń jobasymen tanysqan kezde pragmatizm baǵyty boiynsha birshama shara engizilgenin baiqadyńyzdar. Sondyqtan, jospardy júzege asyrý barysynda qoǵamnyń barlyq kúsh-jigerin bul iske jumyldyrý kerek. Ol úshin Aqparat jáne qoǵamdyq damý ministrligi Mádeniet jáne sport ministrligimen, Bilim jáne ǵylym ministrligimen, ziialy qaýym, qoǵamnyń belsendi ókilderin tarta otyryp, osy ádet-ǵuryptyq rásimderdi, ásirese toilar men astardy ysyrapsyz ári dańǵazasyz ótkizýge bailanysty usynymdardy daiyndaýǵa tapsyrýdy durys dep esepteimin», - dedi Memlekettik hatshy Aqordada ótken Ulttyq komissiia jiynynda.
Onyń aitýyna qaraǵanda, «Rýhani jańǵyrý» baǵdarlamasy sheńberinde Úkimetten bastap, jergilikti atqarýshy organdarǵa beriletin tapsyrmalar bar.
«Biz aldaǵy jumys josparymyzdy óte jinaqy maqsatty ári nysanaly túrde júrgizýimiz kerek. Ol úshin jumys josparyn úsh baǵytqa jiktep otyrmyz. Birinshi baǵyt – tulǵalyq damý baǵyty. Bul baǵyttyń ishine bilimniń saltanat qurýy, pragmatikalyq qundylyqtardy sińirý, básekege qabilettilik syndy qundylyqtardy jinaqtap, adami kapitaldy arttyrýǵa baǵyttaimyz. Ásirese, jastar máselesine erekshe kóńil bólinýi kerek. Ekinshi baǵyt – ulttyq biregeilikti saqtaý. Bul baǵyt ulttyq qundylyqtardy saqtaý, ulttyq biregeilikti halyqaralyq deńgeide kórsetý syndy keshendi sharalardy qamtidy. Úshinshi baǵyt – memleket pen qoǵamnyń damýy. Bul baǵyt elimizde revoliýtsiialyq damý emes, evoliýtsiialyq damý, sananyń ashyqtyǵy, «Halyq únine qulaq asatyn memleket» tujyrymdamasy aiasynda júzege asady. Baǵdarlamany júzege asyrýda naýqanshylyqqa jol bermeýimiz kerek», - dedi Memlekettik hatshy.
Qyrymbek Kósherbaev atalǵan mindetterdi sapaly túrde oryndaý úshin komissiia atynan naqty birqatar tapsyrma beriletinin jetkizdi.
«Birinshiden, memlekettik komissiianyń hattamasymen «Rýhani jańǵyrý» baǵdarlamasyn iske asyrý jónindegi 2020 jylǵa arnalǵan is-sharalar jospary bekitilsin. Ekinshiden, Qazaqstan Respýblikasynyń Úkimeti «Rýhani jańǵyrý» baǵdarlamasyn iske asyrý jónindegi 2020 jylǵa arnalǵan is-sharalar josparynda kózdelgen sharalardyń qarjylandyrylýyn jáne sapaly iske asyrylýyn qamtamasyz etýi kerek. Úshinshiden, BǴM bilim berýdi damytýdyń memlekettik baǵdarlamasyna patriottyq bilimdilik, básekege qabilettilik, fýnktsionaldyq, ulttyq kod siiaqty tárbielik elementterdi qamti otyryp, kúsheitilgen tárbie komponentin engizý jóninde shuǵyl sharalar qabyldasyn. Sonymen qatar, birtutas Qazaqstan memlekettik ideologiiasynyń pármenin júrgizý maqsatynda jalpy Qazaqstanda balalar men jastar qozǵalysyn qurý jóninde Memleket basshysynyń atyna usynys daiyndalsyn. Jas urpaqty patriotizmge baýlý jáne olardyń básekege qabilettigin arttyrý maqsatynda halyq sany 30 myńnan joǵary aýdan ortalyqtarynda aýyl balalaryna arnalǵan beiimdik daryndy balalar mektep-internattaryn ashý, sondai-aq áskeri kadetter mektepterin ashý, onda jetim jáne ata-ananyń qamqorlyǵynsyz qalǵan balalardyń da oqýyna qajetti múmkindik jasaý jóninde Prezident Ákimshiligine 1 naýryzǵa deiin tiisti usynys engizilsin», - dedi ol.
Memlekettik hatshy sonymen qatar tanymdyq baǵdarlamalar shyǵarýǵa barlyq BAQ-ty jumyldyrýdy júktedi.
.jpeg)