Búgin Aqordada QR Memlekettik hatshysy Qyrymbek Kósherbaev birqatar azamatqa memlekettik nagradalardy tapsyrdy, dep habarlaidy QazAqparat tilshisi.
«Otanymyzdyń osynaý qasietti merekesi qarsańynda jyl saiyn Qazaqstannyń jarqyn bolashaǵy jolynda qajyrly eńbegimen qaltqysyz eńbek etip jatqan asyl azamattarymyzdy mártebeli memlekettik nagradalarmen marapattaý igilikti dástúrge ainaldy. Árine, Táýelsizdiktiń máni de, mańyzy men maǵynasy da airyqsha. Qazaq degen halyqtyń san ǵasyrǵa jalǵasqan jáne qazir ǵana iske asqan armany. Derbes memleket qurý halqymyzdyń baiyrqaly bostandyqqa, egemen eldikke, azat rýhqa degen arpalysynyń naqty jemisi»,- dedi Memlekettik hatshy.
Onyń atap ótýinshe, Táýelizdikti ornyqtyrýda Qazaqstannyń Tuńǵysh Prezidenti - Elbasy Nursultan Nazarbaevtyń orasan zor kúsh-jigeri, tereń aqyl-parasaty, syndarly, salmaqty saiasaty jáne barlyq qazaqstandyqtardyń birligi men jasampaz eńbegi airyqsha ról atqarǵan. Memlekettik hatshynyń aitýynsha, búgingi tańda Táýelsizdikti nyǵaitýdaǵy tarihi joldy jalǵastyryp kele jatqan Memleket basshysy Qasym-Jomart Toqaev ta Qazaqstannyń taiaý jyldardaǵy qarqyndy damý baǵyttaryn belgilep, atalǵan mindetteri sheshýdiń naqty joldaryn kórsetip bergen.
«Bizdiń maqsat - osy keleli mindetterdi bárimiz jumylǵan judyryqtai birge júzege asyryp, Táýelsizdigimiz jańa beleske kóterý, Táýelsizdigimizdi baiandy etý. Bul oraida sizder ár saladaǵy eńbekterińizben memlekettiliktiń irgesin bekemdeýge, elimizdiń áleýmettik-ekonomikalyq qoǵamdyq-saiasi jáne mádeni-rýhani damýyna, saliqaly ult, salaýatty urpaq qalyptastyrý isine eleýli úles qosyp júrsizder. Sondyqtan Memleket basshysymen jarlyǵymen sizder Táýelsiz elimizdiń joǵary memlekettik nagradalarymen marapattaldyńyzdar», - dedi Qyrymbek Kósherbaev.
Osydan keiin Memlekettik hatshy aqyn Marfýǵa Aithojaǵa II dárejeli «Barys» ordenin, aqyn Nesipbek Aitqa III dárejeli «Barys» ordenin tapsyrdy. Sondai-aq bir tóp óner qairatkeri «Qazaqstannyń eńbek sińirgen qairatkeri» qurmetti ataǵyn aldy. Bir top ǵalymǵa Qazaqstan Respýblikasynyń ál-Farabi atyndaǵy ǵylym men tehnika salasyndaǵy 2019 jylǵy memlekettik syilyǵy berildi.
.jpeg)