Foto: Aqorda
Memlekettik keńesshi Erlan Qarin Uly Jeńistiń 80 jyldyǵyna arnalǵan jalpyulttyq is-sharalar aiasynda Keńes Odaǵynyń Batyry Áliia Moldaǵulovanyń eskertkishine gúl shoǵyn qoidy. Bul týraly Aqorda málim etti.
Jiynǵa Ulttyq quryltaidyń jáne Jastar saiasaty jónindegi keńestiń birqatar múshesi qatysty.
Biyl elimiz Áliia Moldaǵulovanyń 100 jyldyq mereitoiyn atap ótip jatyr.
Erlan Qarin saltanatty rásimde Prezident tapsyrmasyna sáikes osynaý ataýly dataǵa orai kóptegen is-shara josparlanǵanyn jetkizdi.
Atap aitqanda, Uly Jeńistiń 80 jyldyǵyna jáne Áliia Moldaǵulovanyń 100 jyldyǵyna orai jastar arasynda halyqaralyq «Aibyn» áskeri-patriottyq jiyny ótedi.
Sondai-aq qazaqtyń qaisar qyzynyń ómir joly men eren erligin pash etetin derekti film túsirilip, kórmeler men sporttyq-mádeni is-sharalar uiymdastyrylady.
Áliia Moldaǵulova óskeleń urpaq úshin erlik pen janqiiarlyqtyń úlgisi bolyp qala beredi.
