Memleket qajettilikteri úshin jer telimderi naryqtaǵy baǵa boiynsha qaitaryp alynady, dep habarlaidy "Ult aqparat" QR Ádilet ministrligine silteme jasap.
Aita keteiik, 2019 jyldyń 21 qańtarynda Memleket basshysy Menshik quqyǵyn qorǵaýdy kúsheitý, tórelik, sot júktemesin ońtailandyrý jáne qylmystyq zańnamanyń odan ári izgilendirý máseleleri boiynsha zańǵa qol qoidy. Miinstrliktiń pikirinshe, bul qujat «memlekettik qajettilikter úshin jer ýchaskelerin qaitaryp alýda teń baǵaly aqy tóleýge múmkindik beredi».
«Zańǵa sáikes, endi memlekettik qajettilikter úshin jer telimderi quqyqtardyń týyndaý sebepterine qaramastan, naryqtyq baǵada qaitaryp alynady», - delingen resmi habarlamada.
Qazirgi ýaqytta qaitaryp alynatyn telimderdiń quny kadastrlyq baǵada nemese azamattyq-quqyqtyq kelisimshartta nemese sot sheshiminde kórsetilgen baǵa boiynsha anyqtalyp júr. Bul baǵalar jer ýchaskeleriniń naryqtyq baǵalaryna sáikes kelmeidi.
Odan bólek, memleket paidasyna berilgen jer ýchaskesiniń ornyna menshik iesine teń baǵaly jer telimin berý shyǵyndary úshin zań júzinde ákimdikter jaýapty bolady.
«Osylaisha, túzetýler azamattardyń alynǵan jer ýchaskeleri úshin ádil qaitarym alýyna baǵyttalǵan. Bul maqsatta Jer kodeksi men «Memlekettik menshik týraly» Zańǵa sáikes túzetýler engizildi», - dep túsindirdi ministrliktiń baspasóz qyzmeti.
