Qarjyny igermegen baǵdarlama ákimshilerine aiyppul salynady. Bul týraly Premer-Ministrdiń birinshi orynbasary - Qarjy ministri Álihan Smaiylov málim etti, dep habarlaidy QazAqparat.
«Qazirgi kezde ákimshilik quqyq buzýshylyq týraly zańnamaǵa ózgerister engizýdemiz. Iaǵni biýdjettik baǵdarlamalar ákimshisiniń birinshi jetekshisine aiyppul túrinde jaýapkershiligin qarastyratyn tiisti túzetýdi engizýdemiz. Aqshalai aiyppul aitarlyqtai qomaqty bolady. Bul, óz kezeginde, qarjyny sapaly ári tiimdi igerý úshin yntalandyratyn bolady», - dedi Á. Smaiylov Senatta tilshiler saýalyna jaýap bere otyryp.
Budan buryn habarlanǵandai, jaqynda Álihan Smaiylov qai ministrlikter biýdjetti igere almai jatqanyn aitqan edi.
«Al respýblikalyq biýdjettiń shyǵyndary 8 trln 541 mlrd teńgeni qurady. Oryndalmaý somasy - 14,3 mlrd teńge. Onyń 5,7 mlrd teńgesi - únemdelgen qarajat. 8,6 mlrd teńge igerilmei jatyr. Bul 2018 jyldyń 9 aiymen salystyrǵanda bes ese az. Eń kóp igerilmegen soma myna ákimshilerde qalyptasty: Ekologiia, geologiia jáne tabiǵi resýrstar ministrligi - 1,5 mlrd teńge, Joǵarǵy sot - 1,2 mlrd teńge, Mádeniet jáne sport ministrligi - 992 mln teńge, Saýda jáne integratsiia ministrligi - 947 mln teńge. Qarjy igermeýdiń negizgi sebepteri - konkýrstyq rásimderdi uzaq ótkizý, oryndalǵan jumys aktilerin ýaqtyly usynbaý, qazynashylyq organdaryna tirkeýge sharttar men qosymsha kelisimderdi kesh usyný», - dedi ol.
