QR Qarjy ministri Erulan Jamaýbaev 11 aidyń qorytyndysy boiynsha memlekettik biýdjettiń atqarylý kórsetkishteri týraly baiandady, dep habarlaidy QazAqparat.
«Memlekettik biýdjetke kirister 8 trln teńge somasynda tústi nemese jospar 104,7%-ke atqaryldy. Respýblikalyq biýdjetke kirister 5 trln 224 mlrd teńge somasynda tústi nemese jospar 101,4%-ke oryndaldy. Jalpy kirister boiynsha jospar 74 mlrd teńgege artyǵymen oryndaldy. Salyq boiynsha 65 mlrd teńgege atqarylmady, salyqtyq emes túsimder 140 mlrd teńgege artyǵymen oryndaldy», - dep atap ótti E. Jamaýbaev Úkimet otyrysynda.
Ministrdiń aitýynsha, salyqtar boiynsha negizgi atqarylmaý somasy qosylǵan qun salyǵyna tiesili.
«Qosylǵan qun salyǵy boiynsha jospardyń atqarylmaý sebepteri: ótken jyldyń uqsas kezeńimen salystyrǵanda qosylǵan qun salyǵyn qaitarýdyń 50% nemese 181,5 mlrd teńgege ósýi; «Elektrondy shot-faktýralar» aqparattyq júiesi derekterine sáikes satý boiynsha ainalymdardyń 13,6% azaiýy. Negizgi azaiý taý-ken ónerkásibi salasyna tiesili, onda ainalymdar 2019 jylmen salystyrǵanda 41,6% nemese 8 trln teńgege azaiǵan; 2019 jyldyń 10 aiymen salystyrǵanda Qazaqstannyń úshinshi eldermen taýar ainalymynyń 14,3%, 2019 jyldyń 9 aiymen salystyrǵanda Eýraziialyq Ekonomikalyq Odaq elderimen – 11,6% tómendeýi», - dep túsindirdi ministr.
Sonymen birge, jospar paidaly qazbalar óndirýge salynatyn salyq boiynsha 14 mlrd teńgege asyra oryndaldy. Negizgi sebep tústi metaldar óndirý kóleminiń ulǵaiýy bolyp otyr.
«Jergilikti biýdjet kiristeri 111,3%-ke atqaryldy jáne 2 trln 811 mlrd teńgeni qurady. Jalpy jospar 285 mlrd teńgege asyra oryndaldy. Onyń ishinde salyqtar boiynsha - 269 mlrd teńgege. Barlyq óńirlerde kirister boiynsha josparlar asyra oryndaldy», - dedi Qarjy ministri.
