Memlekettik borysh qaýipsiz deńgeide qalyp otyr. Bul týraly Májilistiń jalpy otyrysynda QR Úkimetiniń 2020 jylǵy respýblikalyq biýdjettiń atqarylýy týraly esebin talqylaý kezinde QR Qarjy ministri Erulan Jamaýbaev málim etti, dep habarlaidy QazAqparat.
«2020 jyly respýblikalyq biýdjettiń atqarylýy iskerlik belsendiliktiń aitarlyqtai tómendeýi men COVID-19 bailanysty qatań shekteý sharalary jaǵdaiynda júzege asyryldy. Jalpy ishki ónim naqty 2,6 paiyzǵa tómendedi. Bul negizinen karantindik sharalardyń engizilýinen qyzmetter kórsetýdiń 5,4 paiyzǵa tómendeýine bailanysty boldy. Degenmen, ekonomikanyń naqty sektory
2 paiyzǵa óskenin kórsetti. Atap aitqanda, qurylys – 11,2 paiyzǵa, aqparat jáne bailanys – 8,7 paiyzǵa, aýyl sharýashylyǵy – 5,6 paiyzǵa, óńdeý ónerkásibi – 3,9 paiyzǵa. Negizgi kapitalǵa salynatyn investitsiialar kólemi 3,4 paiyzǵa tómendedi», - dedi E. Jamaýbaev.
Onyń aitýynsha, biýdjettiń basym baǵyttary tótenshe jaǵdai kezinde azamattardy jáne naqty sektordy qoldaýǵa arnalǵan shyǵystar boldy. Bul - áleýmettik tólemderdi indeksteý, shaǵyn jáne orta biznes sýbektilerine salyq aýyrtpalyǵyn tómendetý, «Jumyspen qamtý jol kartasy», «Biznes jol kartasy», «Eńbek» jáne basqa da baǵdarlamalar.
«Ekonomikalyq ósimdi qalpyna keltirý boiynsha Keshendi jospar qabyldandy. Zardap shekken salalardan shamamen 700 myń kásipker salyqtyq yntalandyrý jáne jeńildik sharalarymen qamtyldy. Shaǵyn jáne orta biznes kreditteri jeńildetilgen sharttarmen qaita qarjylandyryldy. 40 myńǵa jýyq joba arzandatylǵan mólsherlememen qarjylandyryldy. Zardap shekken salalarda qaryz alýshylardyń 80 paiyzy kreditter boiynsha tólemderin keiinge qaldyrý múmkindigin aldy. Osy sharalar jumyspen qamtý men iskerlik belsendilikti saqtaýǵa yqpal etti», - dedi ministr.
Sonymen qatar ol jumyssyzdyq 4,9% deńgeiinde saqtalǵanyn aitty.
«Biýdjet protsesiniń ikemdiligi qamtamasyz etildi, memlekettik satyp alýdyń arnaiy tártibi engizildi. Osyndai jaǵdailarda respýblikalyq biýdjettiń atqarylýy mynadai kórsetkishtermen sipattalady. Biýdjet túsimderi 100,3 paiyzǵa oryndalyp, 12 trln
49 mlrd teńgeni qurady. Shyǵystar 98,3 paiyzǵa igerildi jáne 14 trln 234 mlrd teńgeni qurady. Áleýmettik shyǵystar 2019 jylmen salystyrǵanda 1,4 trln teńgege ulǵaiyp, 6,6 trln teńgeni qurady. Bul respýblikalyq biýdjettiń jalpy kóleminiń
47 paiyzy. Biýdjet tapshylyǵy 2 trln 185 mlrd teńge nemese jalpy ishki ónimniń 3,1%-y boldy. Memlekettik borysh qaýipsiz deńgeide qalyp otyr», - dedi Erulan Jamaýbaev.
