QR Tuńǵysh Prezidenti - Elbasy qory Qazaqstan Úkimetimen birlesip salalyq menedjerlerdi daiarlaý baǵdarlamasyn iske asyrýǵa kirisedi, dep habarlaidy "Ult aqparat" primeminister.kz saityna silteme jasap.
Baǵdarlama Elbasynyń «El úmiti» bastamasy aiasynda ázirlengen jáne «100 naqty qadam» Ult josparyn, sondai-aq Qazaqstan Prezidenti Q. Toqaevtyń ekonomika men áleýmettik salany memlekettik basqarýda jańa tásilderdi engizý qajettigi týraly tapsyrmasyn sapaly oryndaýǵa baǵyttalǵan.
Baǵdarlamany Tuńǵysh Prezident qory Úkimetpen jáne AHQO-men birlesip júzege asyrady. Onyń basty maqsaty — salalyq kásibi tulǵalardy tabý jáne olardy ekonomikanyń basymdyqty salalarynda ózgeristerdi basqarýda kóshbasshylar retinde odan ári daiarlaý.
Máselen, 2019 jyly 27 qarashada talantty jastarmen ótken kezdesýde QR Tuńǵysh Prezidenti – Elbasy Nursultan Nazarbaev ekonomikanyń túrli salalarynda kásibi mamandardyń qalyptasýynyń mańyzdylyǵyn atap ótti.
«Basty talap – eń úzdik bilim men álemniń jetekshi kompaniialarynda tájiribe jinaý ǵana emes, komandada jumys istei bilý, kúrdeli mindetter úshin jaýapkershilik ala bilý jáne olardy sońyna deiin jetkize bilý. Baǵdarlama boiynsha iriktelgen árbir maman ózgerister basqarý menedjerine deiingi oqytýdan ótedi», — degen bolatyn Elbasy.
Baǵdarlamanyń ózektiligi Memleket basshysy alǵa qoiǵan memlekettik basqarýdyń jańa modelin qalyptastyrý boiynsha mindetter aiasynda arta túsedi. El Prezidenti Q. Toqaev «bizge túrli salalarda jańa formatsiiadaǵy basqarýshylar komandasy kerek» dep atap ótken edi.
Baǵdarlama qazaqstandyq kásibi mamandardy memlekettik basqarýǵa tartý úshin qosymsha jaǵdailar jasaidy. Bul rette, azamattardyń memlekettik apparatpen yntymaqtastyǵynyń jańa formattary usynylady. Bul olardy mindetti túrde memlekettik qyzmette laýazymǵa ie bolýǵa tartýdy kózdemeidi.
Baǵdarlama aiasynda birinshi kezeńde saýda jáne logistika, qurylys, aýyl sharýashylyǵy, geologiialyq barlaý jáne ónerkásip (sonyń ishinde – jańa indýstriia), sý resýrstary, óńirlik damý jáne qalalardy basqarý, týrizm, mádeniet jáne sport, bilim berý, densaýlyq saqtaý jáne mediaindýstriia sekildi 11 saladaǵy naqty mindetterdi júzege asyrýǵa 200 qazaqstandyq kásibi mamandy tartý kózdelgen.
Baǵdarlamaǵa qatysýǵa memlekettik jáne jekemenshik sektorda jumys isteitin, sonyń ishinde shetelde turatyn, tabysty praktikalyq tájiribesi, kásibi bilimi jáne eń bastysy – memlekettiń órkendeýine jeke úlesin qosýǵa nieti bar QR azamattary shaqyrylady.
Baǵdarlamaǵa qatysýshylar álemniń jetekshi institýttary men kompaniialarynda kýrstar men taǵylymdamalar túrinde fýnktsionaldyq jáne salalyq oqytýdan ótedi.
Ózgeristerdi basqarý boiynsha menedjerlerdi daiarlaý baǵdarlamasynyń mańyzdy komponenti — onyń qatysýshylarynyń joǵaryda atalǵan 11 saladaǵy eń ózekti 49 praktikalyq mindetterdi sheshýi.
Baǵdarlamaǵa qatysýshylar ózderiniń tálimgerleri retinde áreket etetin jetekshi otandyq jáne halyqaralyq sarapshylarmen, Úkimet basshylyǵymen tikelei jáne júieli ózara is-qimyl jasaý múmkindigine ie bolady.
Baǵdarlamaǵa jalpy basshylyq etýdi QR Premer-Ministri Asqar Mamin bastaǵan Basqarýshy komitet júzege asyrady. Baǵdarlamany iske asyrýdy TPQ Úkimettiń jobalyq ofisimen birge qamtamasyz etedi.
Baǵdarlamaǵa qatysý úshin úmitkerlerdiń ótinimderin qabyldaý 15 qańtarda bastaldy. Salalyq komandalardy irikteý jáne qalyptastyrý protsesi osy jyldyń 15 naýryzyna deiin aiaqtalady. Bul jumyspen arnaiy táýelsiz komissiia ainalysady. Kandidattardy baǵalaýǵa, irikteýdiń obektivtiligi úshin halyqaralyq sarapshylar tartylatyn bolady. Baǵdarlamaǵa qatysýǵa ótinim berý úshin cv@elumiti.kz elektrondyq poshtasyna keri bailanys úshin bailanys derekterin kórsete otyryp, túiindeme jiberý qajet.
