Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine memlekettik basqarý deńgeileri arasynda ókilettikterdi qaita bólý máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaidy QazAqparat.
Zań jobasyn qabyldaýdaǵy maqsat – memlekettik basqarý deńgeileri arasynda ókilettikterdi odan ári qaita bólý. Sondai-aq aldyńǵy ákimshilik reformalardy jalǵastyrý.
«Joba Memleket basshysynyń tapsyrmalaryn, strategiialyq qujattarda jáne sarapshylardyń usynymdarynda aiqyndalǵan basymdyqtardy eskere otyryp daiyndaldy. Ony ázirleý kezinde ortalyq jáne jergilikti deńgeilerdegi memlekettik fýnktsiialardy taldaý boiynsha aýqymdy jumys júrgizildi. Zań jobasynda 55 zańnamalyq aktige, onyń ishinde 5 kodeks pen 50 zańǵa túzetýler kózdelip otyr», - dedi QR Ulttyq ekonomika ministri Áset Erǵaliev.
Zań jobasy sheńberinde 94 fýnktsiia qaita bólinedi, onyń ishinde:
- Úkimetten ministrlikterge 89 fýnktsiia beriledi;
- jergilikti atqarýshy organdarǵa 5 fýnktsiia beriledi.
«Sonymen qatar, 4 memlekettik organǵa qosymsha ókilettikter beriledi. Jalpy, zań jobasyn qabyldaý memlekettik basqarýdyń tiimdi júiesin qalyptastyrýda kezekti qadam bolady jáne onyń derbestigin odan ári arttyrýǵa yqpal etedi. Zań jobasy basqarý deńgeileri arasyndaǵy naqty ókilettikterin ajyratý boiynsha júrgizilip jatqan saiasattyń sabaqtastyǵyn qamtamasyz etýge baǵyttalǵan. Jobany iske asyrý memlekettik biýdjetten qosymsha qarjy shyǵyndaryn talap etpeidi ári teris áleýmettik-ekonomikalyq jáne quqyqtyq saldarǵa ákep soqpaidy», - dedi ministr.
