Foto: iStock
Memleket basshysy Qasym-Jomart Toqaev agroónerkásip keshenin tikelei sýbsidiialaý tásilinen arzan nesie berý tásiline birtindep kóshý – asa mańyzdy mindet ekenin aitty.
"Bólingen qarajattyń bári tiimdi jumsalýǵa tiis. Alaida shyndyqqa janaspaityn aqparat berý, basqasha aitqanda, málimetterdi burmalaý aýyl sharýashylyǵyndaǵy shynaiy ahýaldy baǵalaýǵa kedergi keltirip otyr", - dedi ol.
Prezidenttiń aitýynsha, arnaiy komissiia 2 million iri qara jáne 3 millionnan astam ýaq mal sanda bar, sanatta joq ekenin anyqtady.
"Egin sharýashylyǵy salasynda da osyndai jaittar bar ekeni belgili boldy. Shyn máninde, munyń bári – memleketten sýbsidiia alý úshin jasalǵan kózboiaýshylyq. Ondai qylmystyq áreketterge tosqaýyl qoiý qajet. Al mundai ispen ainalysqan adamdardy jaýapkershilikke tartý kerek", - dedi ol.
Toqaev jer aýyl sharýashylyǵy salasyna investitsiia tartýdyń basty kepili ekenin aitty.
"Jer telimderin qaitarý jónindegi arnaiy komissiia ákimdikterdiń aýyl sharýashylyǵy alqaptaryn konkýrs ótkizbei-aq berý týraly eki myńnan astam zańsyz sheshim qabyldaǵanyn anyqtady. Bul másele qatysty ekiushty ustanym bolmaýy qajet. Zańsyz alynyp, paidalanylmai jatqan jer ońtailandyrylǵan rásim boiynsha memleketke qaitarylýǵa tiis. Al jerdi paidalanýshy oǵan investitsiia salyp, adal eńbek etip jatsa, jumysqa bóget jasamaý kerek. Sondai-aq onyń aýyldy kórkeitip, turǵyndarǵa turaqty jumys berip otyrǵanyn da eskergen jón", - dedi ol.
