Bas prokýratýra azamattardy zańsyz áreketke barmaýǵa shaqyrady, dep habarlaidy "Ult aqparat" vedomstvonyń baspasóz qyzmetine silteme jasap.
Sońǵy kezde áleýmettik jelilerde jáne messendjerlerde kópe-kórineý jalǵan aqparattardy taratý jaǵdailary kóbeiip ketti. Atap aitqanda, Arys qalasynda 350 turǵynnyń habar-osharsyz ketkeni jáne qaitadan jarylystardyń bolýyna bailanysty ol jerde turýdyń qaýipti ekeni týraly jalǵan qaýeset te taraldy. Munyń ózi kópshiliktiń arasynda úrei týǵyzyp, Shymkent qalasynda zańsyz aktsiialardyń ótýine itermeledi.
«Arys qalasyndaǵy jaǵdaiǵa qatysty teris aqparat faktileri boiynsha sotqa deiingi tergep-tekserý júrgizilýde. Sonymen qatar, elimizdiń jańa ulttyq valiýta - «altynǵa» kóshetini, jinaǵan aqshany soǵan bailanysty dereý dollarǵa aiyrbastap, jyljymaityn múlikti satyp alý úshin jańa qaryzdardy resimdeý qajettigi týraly shyndyqqa sai kelmeitin málimetterdi taratýshylar baiqalýda. Shyǵys Qazaqstan oblysyndaǵy jerlerdiń sheteldikterge satylǵany týraly shyndyqqa sai kelmeitin ári arandatýshylyq aqparattardyń taraýy da azamattardy mazasyz kúige túsirdi» delingen habarlamada.
Osy aitylǵan mán-jailardy eskere kele, quqyq buzýshylyqtardyń aldyn alý jáne qoǵamdyq qaýipsizdikti qamtamasyz etý maqsatynda «Prokýratýra týraly» Zańnyń 32-babyn basshylyqqa ala otyryp, Bas prokýratýra tómendegi jaǵdailardy túsindiredi:
Memleket ár adamnyń aqparatty erkin alý ári taratý quqyǵyna kepildik beredi.
«Aqparatqa qol jetkizý týraly» zańǵa sai, azamattar qajetti aqparatty alý úshin memlekettik organdarǵa júginýge quqyly.
Óz kezeginde, memlekettik organ qol jetkizýge shekteý qoiylǵan aqparattardan basqa suratylyp otyrǵan málimetterdi usynýǵa mindetti.
Memlekettik organdardan alǵan resmi aqparatty azamattar qandai da bir shekteýsiz bólisýge quqyly.
Memleketke, qoǵam men adamnyń quqyqtaryna eleýli ziian keltiretin ekstremistik jáne kórineý jalǵan aqparat taratýǵa tyiym salynady.
Atap aitqanda, qoǵamdyq tártipti buzatyn nemese azamattardyń, uiymdardyń, qoǵam men memlekettiń zańdy múddelerine eleýli ziian keltiretin osyndai árbir fakt boiynsha Qylmystyq kodekstiń 274-baby boiynsha qylmystyq jaýapkershilik kózdelgen.
Buqaralyq aqparat quraldaryn nemese telekommýnikatsiia jelilerin paidalana otyryp jasalǵan osyndai áreketter úsh jylǵa deiin bas bostandyǵynan aiyrýǵa ákep soǵady. Jappai tártipsizdikke arandatyp, azamattarǵa zorlyq-zombylyq jasaýǵa shaqyrý úshin Qylmystyq kodekstiń 272-baby boiynsha qylmystyq jaýapkershilik qaralǵan.
Osy aitylǵan mán-jailardy eskere otyryp, Bas prokýratýra azamattardy janjal týdyratyn jáne qoǵamdyq tártipti buzatyn zańsyz áreketterge barýdan, onyń ishinde jalǵan aqparat taratýdan tartynýǵa shaqyrady.
