Memleket tarapynan sýbsidiialanatyn jumys oryndarynyń kólemi 90 myńnan 211 myńǵa artty. Bul týraly Úkimet otyrysynda QR Premer-Ministriniń orynbasary Eraly Toǵjanov aitty, dep habarlaidy QazAqparat.
«Jumyspen qamtý máselesi arnaiy qurylǵan vedomstvoaralyq komissiianyń 6 otyrysynda qarastyrylǵan bolatyn. Memlekettik organdarǵa, óńirlerge 50-den astam naqty tapsyrmalar berildi. Onyń ishinde búkil kemshilikke bailanysty tapsyrmalardy óńirler aldy. Jalpy, Jumyspen qamtý jol kartasy boiynsha jobalardyń tórtten biri bilim salasyndaǵy nysandarǵa qatysty. Onyń ishinde 1 400-ge jýyǵy mektep, balabaqsha, internattardy quraidy», - dedi ol.
Onyń atap ótýinshe, jobalarǵa 50 paiyz qyzmetkerlerdi jumyspen qamtý ortalyqtary arqyly tartý talaby tolyq oryndalyp otyr. «Eńbek» baǵdarlamasy aiasynda 6 myńnan astam mikrokreditter men granttar berilip jatyr. Onyń ishinde 30 paiyzyn az qamtylǵan jáne kópbalaly otbasylar, múgedektigi bar azamattar jáne jastar quraidy. Memleket tarapynan sýbsidiialanatyn jumys oryndarynyń kólemi 90 myńnan 211 myńǵa ósip otyr.
«Asqar Uzaqbaiuly, halyqty jumysen qamtý maqsatynda tiisti memlekettik organdar men ákimdikterge birinshiden, jumyspen qamtý aiasyndaǵy memlekettik baǵdarlamalardaǵy tetikterdi tiimdi ise asyrýdy, ekinshiden árbir jumystan bosatylǵan azamatpen jumys jasap, memlekettik qoldaý kórsetýdi, úshinshiden, memleketten bólinip jatqan qarajatty maqsatty túrde paidalanýdy qamtamasyz etýdi tapsyrýyńyzdy suraimyz», - dep ótindi Eraly Toǵjanov Premer-Ministr Asqar Maminnen.
