Memleket menshiginde tek áleýmettik nysandar jáne memlekettiń qaýipsizdigi men qalypty jumysyn qamtamasyz etetin nysandar ǵana qalýy kerek. Bul týraly Memleket basshysy Qasym-Jomart Toqaev málimdedi, dep habarlaidy QazAqparat.
«Úkimet Jańa jekeshelendirý josparyn qabyldaýǵa tiis. Memleket menshiginde tek áleýmettik nysandar, sondai-aq memlekettiń qaýipsizdigi men qalypty jumysyn qamtamasyz etetin nysandar ǵana qalýy kerek.
Kvazimemlekettik sektorda ákimshilik-basqarý jumysymen ainalysatyn qyzmetkerlerdiń sanyn, paidasyz shyǵyndardy jáne basy artyq enshiles kompaniialardy qysqartý jumystary jalǵasyn tabýǵa tiis», - dedi Prezident.
Osy oraida Prezident «Báiterek» jáne «QazAgro» holdingilerin biriktirip, shtatty 50 paiyzǵa qysqartýdy tapsyrdy.
«Báiterek» jáne «QazAgro» holdingteriniń róline arnaiy toqtalǵym keledi.
Bul kompaniialar indýstriialandyrý jáne agroónerkásiptik keshendi damytý isine eleýli úles qosyp, buryn bir-birimen bailanyssyz bolǵan qarjy institýttarynyń qyzmetin retke keltirdi.
Al, qazir biz múlde jańa jaǵdaida turmyz. Institýtsionaldyq qurylymdy ózgertý – ýaqyt talaby. Sondyqtan, osy eki uiymdy biriktirip, qarjylyq múmkindikteri anaǵurlym zor damý institýtyn qurǵan jón.
Bul rette, portfeldi kompaniialardyń sany 2 esege azaiyp, shtat sany da 50 paiyzǵa qysqarýǵa tiis», - dedi Prezident.
