Foto: Pexels.com
2027 jyldan bastap Qazaqstanda mindetti áleýmettik meditsinalyq saqtandyrý (MÁMS) júiesine memleket tarapynan túsetin jarna kólemi kezeń-kezeńimen ulǵaiady, dep habarlaidy Ult.kz.
Bul týraly QR Densaýlyq saqtaý ministrliginiń MÁMS júiesin jetildirý jáne taldaý departamentiniń direktory Lázzat Shomanova Ortalyq kommýnikatsiialar qyzmetinde ótken brifingte málimdedi.
«Biz 2015 jyly qabyldanǵan “Mindetti áleýmettik meditsinalyq saqtandyrý týraly” zańnyń bastapqy qarjylyq modeline ishinara qaita oralamyz. Ol kezde memleket tóleitin jarna kólemi 7% dep belgilengen bolatyn. Qazirgi tańda bul kórsetkish nebári 2% deńgeiinde», – dedi Shomanova.
Mamannyń aitýynsha, jarna úlesiniń artýy jumysshylar men jumys berýshilerge túsetin júktemeni kóbeitpei-aq, meditsinalyq kómektiń uzaq merzimdi turaqtylyǵyn qamtamasyz etýge baǵyttalǵan.
Jańa qarjylandyrý josparyna sáikes, memleket jarnasy 2025 jyly da 2% deńgeiinde qala beredi. Al 2027 jyldan bastap birtindep ósip, 2037 jyly 4,7%-ǵa jetýi tiis. Bul ózgeristerdiń nátijesinde MÁMS júiesine qosymsha 2,8 trillion teńge tartylady dep kútilýde.
Osy qosymsha qarjy halyqqa meditsinalyq kómektiń qoljetimdiligin arttyrýǵa jáne densaýlyq saqtaý júiesin turaqty damytýǵa aitarlyqtai serpin beredi.
