Injenerlik, pedagogikalyq ári jaratylystaný mamandyqtaryna 3 myńnan astam bilim granty qaitadan bólinedi. Bul týraly elordada ótken brifingte QR Bilim jáne ǵylym vitse-ministri Fatima Jaqypova málim etti, dep habarlaidy QazAqparat tilshisi.
«Ókinishke qarai, grantqa ilinbegen talapkerler bar. Ózderińiz bilesizder, konkýrsqa 64 myńnan astam adam qatysty. Biraq biz qazirgi kezde Úkimet qaýlysyna ózgerister engizemiz, sodan keiin belgilengen tártip boiynsha tiisti baǵyttarǵa grantty berýdi jalǵastyramyz. Osy oraida 3 myń grant basymdyqty baǵyttar boiynsha qaitadan taǵaiyndalady», - dedi vitse-ministr.
Bul turǵyda injenerlik, pedagogikalyq, jaratylystaný baǵyttary qamtylady.
Ministrlik málimetine qaraǵanda, atalǵan 3 myń grant negizgi konkýrstan (53 785 granttyń ishinde) igerilmei qaldy. Keibir mamandyqtarǵa úmitkerler az bolǵandyqtan, osy granttar bólinbei qaldy. Sondyqtan osy úsh myń grant talapkerler arasynda qaitadan bólinedi. Osy aptada qaýly jobasy ázirlenip, oǵan tiisti ózgerister engizilip, sodan keiin jinaǵan upailaryna qarai talapkerler ózderiniń granttaryn alady.
Sondai-aq, Fatima Jaqypova kópbalaly otbasylardyń balalary qosymsha konkýrs aiasynda bilim grantyn ala alatynyn aitty.
«Qazaqstan Prezidentiniń tapsyrmasy boiynsha qosymsha 5 myń grant bólindi. Ol granttar jergilikti atqarýshy organdarmen 5-10 tamyz aralyǵynda beriledi. Jalpy respýblikalyq konkýrs boiynsha grantty ielenbegender qosymsha konkýrsqa qatysý múmkindigine ie bolady. Olar 53 785 granttyń ishine kirmeidi», - dedi vitse-ministr.
Aita keteiik, biyl kokýrsqa 53 785 grant bólindi, qatysýshylardyń sany 64 452 adam boldy. Osy oraida bir grantqa ortasha konkýrs 1,29 adamdy qurady.
Búgin tańerteń memlekettik bilim grantyna ie bolǵandardyń tolyq tizimi shyqty.
