QR Premer-Ministri Asqar Maminniń tóraǵalyǵymen Importty almastyrý jáne eksportty ilgeriletý jónindegi vedomstvoaralyq komissiianyń (VAK) ekinshi otyrysy ótti, dep habarlaidy "Ult aqparat" primeminister.kz-ke silteme jasap.
Importty almastyrý jáne «qarapaiym zattar ekonomikasy» salalaryn damytý boiynsha jobalardy iske asyrý jumystarynyń barysy týraly QR Premer-Ministriniń orynbasary R. Skliar jáne «Atameken» UKP basqarma tóraǵasy A. Myrzahmetov, kásipkerlik áleýetti damytý jáne turǵyndardyń tabysyn kóterý maqsatynda óńirlerge skrining júrgizý qorytyndysy týraly «Atameken» UKP basqarma tóraǵasynyń birinshi orynbasary E. Jumaǵaziev baiandady. Sonymen qatar QR biznes qaýymdastyǵynyń ókilderi túsinik berdi.
Ótken aida «Qarapaiym zattar ekonomikasy» jobalyq ofisine 130-dan asa jańa joba kelip tústi, 1 trln teńgege jýyq somaǵa 227 joba pysyqtalyp jatyr. Usynylǵan bastamalar boiynsha kósh basynda Qyzylorda, Jambyl, Shyǵys Qazaqstan oblystary. Artta qalǵandar – Atyraý, Almaty, Soltústik Qazaqstan oblystary.
Salalar bólinisinde jobalar sany boiynsha mashina jasaý (55 joba), azyq-túlik ónerkásibi (37) jáne AÓK (35) kósh basynda. Bul rette somasy joǵary jobalar himiia ónerkásibinde (324 mlrd teńgege) jáne qurylys materialdary óndirisinde (116 mlrd teńgege) baiqalyp otyr.
«Atameken» UKP ótkizgen óńirler skriningi 2,2 mln úi sharýashylyǵyn (10 mln turǵyn) jáne 788 myń kásipkerlik sýbektisin qamtydy. Skrining nátijeleri kásiporyndardyń kadrlyq qajettiligin (105 myńnan asa adam), kásipkerlik negizderine oqytylýǵa daiyn belsendi turǵyndar sanyn (153 myńnan asa adam) jáne basqa da parametrlerdi anyqtaýǵa múmkindik berdi.
Vedomstvoaralyq komissiia jergilikti óndiris kólemin arttyrý, qosymsha jumys oryndaryn ashý jáne turǵyndardyń tabysyn arttyrý úshin óńirler skriningi qorytyndysyn is júzine asyrý maqsatynda ákimdikterdiń «Atameken» UKP-men birlesip óńir ákiminiń orynbasarynan tómen emes deńgeide jobalyq ofis qurý týraly sheshim qabyldady.
VAK importty almastyrý boiynsha jobalardy irikteý reglamentin bekitti. Atap aitqanda, AÓK jáne óńdeý ónerkásibi salalarynda jańa óndiris qurý nemese qoldanystaǵy óndiristi keńeitý boiynsha, negizgi kapitalǵa salynǵan investitsiialar kólemi 100 mln teńgeden kem emes, iske asyrý merzimi 5 jyldan aspaityn jáne basqa da ólshemderi bar investitsiialyq jobalar qaralatyn bolady. Bul rette aǵymdaǵy qaryzdardy qaita qarjylandyrý jobalary qaraýǵa jatpaidy.
Otyrysqa qatysýshylar aýyl sharýashylyǵy, himiia, toqyma, mashina jasaý jáne basqa da salalarda importty almastyrý boiynsha birqatar naqty jobalardy qarady, olar barlyǵy 4 myńǵa jýyq jańa jumys ornyn qurýǵa jáne 350 mlrd teńgeden astam investitsiia tartýǵa múmkindik beredi.
Úkimet basshysy importty almastyrý jáne eksportty ilgeriletý boiynsha belsendi jumysty jalǵastyrýdy tapsyrdy.
«Memleket biznesti qoldaý jáne kásipkerlikti damytý sharalaryn keńeitedi», — dedi A. Mamin.
