Memleket basshysy «Psihologiialyq qyzmet týraly» Qazaqstan Respýblikasynyń Zańyna qol qoidy, dep habarlaidy ult.kz.
Zańnyń basty baǵyttary:
1. Diplomsyz jáne reestrsiz psiholog bolmaidy. Endi arnaiy joǵary bilimi (diplomy) joq jáne biryńǵai memlekettik reestrge tirkelmegen adamdarǵa ózin «psiholog» dep ataýǵa zańmen tyiym salynady. Kez kelgen azamat mamannyń reestrde bar-joǵyn ońai teksere alady. Reestrde joqtardyń qyzmet kórsetýge quqyǵy bolmaidy.
2. «Psiho» ataýyn jamylyp aldaýǵa jol berilmeidi. Diplomy joq “mamandar”, ”trenerlerge” óz jarnamasynda «psiholog» sózin, sondai-aq odan týyndaityn kez kelgen ataýlardy (mysaly, «psiho-koých», «psiho-keńesshi») qoldanýǵa resmi túrde tyiym salynady. 2 aptalyq kýrsty bitirgenderdiń dáýreni bitti.
3. Onlain-jarnama baqylanady. Psihologtar áleýmettik jelide ózderiniń reestrdegi nómiri men bilimin ashyq kórsetýge mindetteledi. «Problemany 1 kúnde sheshemin» nemese «nátijege 100 paiyz kepildik beremin» dep jalǵan ýáde berip, halyqty aldaǵandar jaýapqa tartylady.
4. Kúrdeli taqyryptarǵa tek kásibi mamandar jiberiledi. Depressiia, psihologiialyq jaraqattar (travma), mazasyzdyq siiaqty tereń máselelermen jáne jalpy psihologiialyq kómek kórsetýmen endi tek kásibi, diplomy bar mamandar ǵana ainalysady. Kásibi daiyndyǵy joq “mamandar” bul salaǵa jolai almaidy.
5. Psiholog pen psihiatrdyń arajigi ajyratylady. Psiholog - dáriger emes. Oǵan meditsinalyq diagnoz qoiýǵa, dári-dármek jazýǵa nemese adam sanasyna áser etetin psihoaktivti ádisterdi qoldanýǵa qatań tyiym salynady. Eger patsientte aýyr psihikalyq aýytqý belgileri bolsa, psiholog ony birden dáriger-psihiatrǵa baǵyttaýǵa mindetti.
6. Kásibi qupiia zańmen qorǵalady. Sizdiń psihologqa aitqan qupiiańyz, jeke ómirińiz sizdiń jazbasha kelisimińizsiz esh jerde jariialanbaidy. Sizdi ruqsatsyz videoǵa nemese aýdioǵa túsirýge de qatań tyiym salynady.
