Memleket basshysy Joldaýynyń mazmuny «durys maǵynamen myqtap bekidi». Bul týraly QR Prezidenti Ákimshiligi Basshysynyń birinshi orynbasary Dáýren Abaev málimdedi, dep habarlaidy "Ult aqparat"
«Meniń oiymsha, Prezidenttiń Joldaýy jalpyǵa túsinikti bolyp shyqty. Muny men jaqsy der em, tipti óte jaqsy. Sebebi qujattyń mazmuny durys maǵynamen myqtap bekidi. Eshqandai illiýziia, oryndalmas josparlar, istiń naqty jaǵdaiynan alystaý da joq», – dep jazdy Dáýren Abaev Facebook-tegi paraqshasynda.
Budan ári problemalardyń keń aýqymyna jáne qamtylýyna qaramastan, Joldaý jalpyǵa birdei túsinikti ekendigi; ortaq problemalarymyzdy sheshýge baǵyttalǵan qarapaiym, biraq jeńildetilmegen formýlalardy qamtityndyǵy aitylady. «Menińshe, bul kezdeisoq emes, sebebi qujat jasaýǵa áleýmettik jelilerdegi hattar, maqalalar, posttar arqyly kópshiligińiz úles qostyńyzdar. Óitkeni qoǵam – bul úlken bilimi bar tutas aǵza, al «estitin memleket» olardy ózine sińiredi, óńdeidi jáne utymdy sheshimder usynady. Devid Istonnyń áigili «qara jáshigi» deýge bolar. Bálkim, sodan da shyǵar, Prezidenttiń buryn usynylǵan bastamalardy eskergenin estip qýanǵan, onymen bólisken posttardyń kóp bolýy», – dep tolyqtyrdy Dáýren Abaev.
Onyń pikirinshe, Joldaý azamattardyń suranystaryn aqtaidy, úmitterin aldamaidy, eń bastysy, senimin nyǵaitady. Joldaýda memlekettik basqarý salasyndaǵy eń kóp talqylanǵan reformalardan basqa kóptegen problema oryn aldy: jasyl jelekter, janýarlardy qorǵaý, adam quqyqtary, buqaralyq sport, meditsina qyzmetkerlerin qoldaý, jergilikti ózin-ózi basqarýdy damytý jáne basqalar.
«Degenmen, meniń oiymsha, tereń simvoldyq sipatqa ie bir mysalǵa toqtalǵym keledi. Prezident ekstrakorporaldyq uryqtandyrýǵa arnalǵan kvotalardy 1 myńnan 7 myńǵa deiin arttyrýdy kózdeitin «Ańsaǵan sábi» baǵdarlamasyn qabyldaýdy tapsyrdy. Memlekettiń otbasylyq saiasaty kóptegen komponentterdi qamtidy, biraq kóbinese balasyz otbasylardyń problemalary kóleńkede qalyp jatady, bul týraly BAQ-ta sirek aitylady, balasyz adamdar mitingiler men piketterge barmaidy, qorqynyshty statistika kóp aityla bermeidi.
Sonymen qatar Densaýlyq saqtaý ministrliginiń derekteri boiynsha bedeýlikten zardap shegetin 14 myńnan astam erli-zaiyptylar esepte tur. Osy sebepti búkil elde júzdegen jáne myńdaǵan otbasy ajyrasýda. Sondyqtan Memleket basshysynyń tapsyrmasy Táýelsizdiktiń 30 jyldyǵynda myńdaǵan otbasyna ata-ana atanýǵa múmkindik beredi. Olar táýelsiz tarihymyzdyń jańa tsikliniń nyshandy bastaýy bolmaq», – dep túiindedi Dáýren Abaev.
