Memleket basshysynyń Belarýs Respýblikasyna resmi sapary aiasynda keńeitilgen quramdaǵy kelissózder ótti, dep habarlaidy "Ult aqparat" Aqordaǵa silteme jasap.
Kelissóz barysynda saýda, ózara investitsiia, qarjy quraldary, bilim jáne aqparattyq tehnologiialar, turǵyn úi jáne jol qurylysy salalaryndaǵy ózara strategiialyq yntymaqtastyq máseleleri qarastyryldy. Sondai-aq, Eýraziialyq ekonomikalyq odaq aiasynda transulttyq korporatsiialar qurý máseleleri talqylandy.
Odan bólek, Elbasy belarýs áriptesine shaqyrýy úshin rizashylyǵyn bildirdi jáne bul sapardyń eki eldiń arasyndaǵy diplomatiialyq qarym-qatynastyń ornaýynyń 25 jyldyǵymen tuspa-tus kelip otyrǵandyǵyn basa aitty.
«Osy jyldardyń ishinde biz sizben birge dostyq pen yqtymaqtastyqtyń qýatty ekonomikalyq, saiasi bazasyn qalyptastyrdyq. Qiyn jaǵdaida siz, Aleksandr Grigorevich elińiz úshin kóp is tyńdyrdyńyz. Belarýs damyǵan naǵyz eýropalyq elge ainaldy», - dedi Nursultan Nazarbaev.
Nursultan Nazarbaev Saýda-ekonomikalyq yntymaqtastyq jónindegi úkimetaralyq komissiia jumysy aiasyndaǵy ekijaqty ýaǵdalastyqtardyń mańyzy zor ekenin de atap ótti.
– Biz Úkimetaralyq komissiianyń teń tóraǵalaryna naqty tapsyrmalar berdik. Sonymen qatar kún tártibindegi ózekti halyqaralyq jáne óńirlik taqyryptar boiynsha pikir almastyq, – dedi Qazaqstan Prezidenti.
Budan bólek, Memleket basshysy eki el arasyndaǵy kólik-tranzittik yntymaqtastyqtyń ózekti ekenin aityp, Qazaqstan men Belarýs arqyly tasymaldanatyn júkter kóleminiń artyp kele jatqanyna nazar aýdardy.
Nursultan Nazarbaev Belarýstiń aqparattyq tehnologiialar salasyndaǵy jetistikterin joǵary baǵalap, osy saladaǵy ózara is-qimyldyń perspektivalaryn aiqyndady.
– Elderimiz aqparattyq tehnologiialardy damytýǵa zor mán berip otyr. Bizde «Alataý» aqparattyq tehnologiialar parki bar, Nazarbaev Ýniversitetinde zertteýler júrgizilýde, «EKSPO-2017» bazasynda IT-startaptar halyqaralyq tehnoparki qurylýda, – dedi Qazaqstan Prezidenti.
Belarýs Respýblikasynyń Prezidenti Qazaqstan-Belarýs arasyndaǵy ekonomikalyq qarym-qatynasta ósimniń tómendeýi eńserile bastaǵanyn aitty.
– Sizdiń búgingi saparyńyz eki eldiń taýar ainalymyn arttyrýǵa múmkindik beredi. Bul rette, Úkimetterimiz músheleri men sarapshylar túrli nusqa men ózekti sheshimder usynady, – dedi Aleksandr Lýkashenko.
Taraptar kelissóz barysynda talqylanǵan aýqymdy máseleler jóninde utymdy tásilder men sheshimder ázirleý úshin Eýraziialyq ekonomikalyq odaqqa múshe memleketterdiń dialogyn jandandyrý qajettigin atap ótti.
Resmi sapar aiasynda birqatar ekijaqty qujattarǵa qol qoiylý josparlanýda.
