QR Prezidenti Joldaýyndaǵy barlyq baǵytty iske asyrý Jalpyulttyq jospary daiyndalady. Bul týraly búgin Úkimet otyrysynda Premer-Ministr Asqar Mamin aitty, dep habarlaidy QazAqparat.
«Memleket basshysy óńirlik saiasatty jetildirýdiń mańyzdylyǵyn atap ótti. Elimizdiń árbir óńirinde infraqurylymdy jańǵyrtýǵa, ár óńirdiń ereksheligin eskere otyryp, halyqtyń turmys sapasy men tabysyn arttyrý úshin ózekti máselelerdi sheshýge baǵyttalǵan naqty jobalar iske asyrylatyn bolady. Ár memlekettik organ, árbir jergilikti atqarýshy organ Memleket basshysynyń tapsyrmalary men bastamalaryn oryndaýǵa dereý kirisýi qajet», - dedi Asqar Mamin.
Onyń atap ótýinshe, Memleket basshysynyń Joldaýyndaǵy barlyq baǵyttardy iske asyrý boiynsha Jalpyulttyq jospar daiyndalatyn bolady.
«Memlekettik organdarǵa Jalpyulttyq jospar boiynsha óz usynystaryn Ulttyq ekonomika ministrligine 3 qyrkúiekke deiin engizýdi tapsyramyn. Ulttyq ekonomika ministrligi Jalpyulttyq jospar jobasyn 4 qyrkúiekke deiin Premer-Ministrdiń keńsesine engizsin. Kelesi otyrysta biz ony qarap, Memleket basshysynyń bekitýine engizý úshin maquldaýymyz qajet», - dedi Premer-Ministr.
