Aqmola oblysyna jasaǵan jumys sapary barysynda Qasym-Jomart Toqaevqa aimaq ákimi Ermek Marjyqpaev óńirdegi júzege asyrylyp jatqan investitsiialyq jobalar men Kókshetaý qalasynyń damý perspektivalary týraly esep berdi, dep habarlaidy "Ult aqparat" Aqordanyń baspasóz qyzmetine silteme jasap.
Prezidentke aimaqtyń negizgi áleýmettik-ekonomikalyq kórsetkishteri, agroónerkásip, týrizm, taý-ken metallýrgiialyq kesheni, mashina jasaý, qurylys indýstriiasy, energetika jáne basqa da salalardaǵy investitsiialyq jobalar tanystyryldy.
Oblys ákiminiń esebin tyńdaǵan Memleket basshysy óńirdi damytýdyń basym baǵyttaryn belgilep berdi.
– Oblystyń aldynda birqatar mindet tur. Sonyń ishinde astyq jinaý naýqany. Árine, bul naýqannyń sátti aiaqtalýy tabiǵatqa tikelei bailanysty ekenin túsinemiz. Degenmen, tabiǵi jaǵdailardyń keri áserin meilinshe azaityp, astyqty barynsha mol jinaý kerek. Bul – bir. Ekinshiden, biylǵy jaz ne kórsetti?! Mal sharýashylyǵymen ainalysatyn qojalyqtar mal satyp alyp, ózderin fermermiz dep ataidy. Biraq jem-shóp qoryn ázirleýdi umyt qaldyrady. Sizdiń baiandamańyzda bul máseleniń qamtylǵany durys boldy. Qazir osy túitkildi sheshýmen ainalysý kerek, – dedi Qasym-Jomart Toqaev.
Memleket basshysy Qosshy aýylyna oblystyq mańyzy bar qala mártebesin berý týraly sheshimin túsindirdi.
– Jarlyqqa qol qoiyldy. Atalǵan qujatqa qol qoiylýyn jáne oblystyq mańyzy bar qala mártebesiniń berilýin kópshilik keńinen qoldap jatyr. Biraq, osy sheshimniń máni men mańyzyn tek oblys kóleminde ǵana emes, jalpy elimiz boiynsha halyqqa qosymsha túsindirý kerek. Bul sheshim, eń aldymen, Qosshy turǵyndarynyń ómirin jeńildetý maqsatynda qabyldandy. Onda qaǵaz boiynsha 40 myńǵa jýyq turǵyn ómir súredi. Shyn máninde, ol jerde 80 myń adam turady. Olar turmystyq máselelerimen oblys ortalyǵy Kókshetaýǵa barýǵa májbúr bolady. Oǵan kóp ýaqyt, kúsh jumsaidy. Árine, bul turǵyndardyń júikesin juqartady. Sondyqtan qalanyń ákimshilik mártebesin ózgertetin osyndai sheshim qabyldandy. Men muny durys sheshim dep esepteimin, – dedi Prezident.
Qasym-Jomart Toqaev Kókshetaý qalasynyń turǵyndaryna bergen ýádesiniń oryndalýy jáne jylý elektr ortalyǵynyń qurylysyna kirisý qajet ekenin aitty.
– Kókshetaý qalasy óz jylý elektr ortalyǵy joq, tek jylý qazandyqtary ǵana bar jalǵyz oblys ortalyǵy bolyp otyr. Bul jobanyń quny birneshe ese ósip, 240 milliard teńge boldy. Biz budan azdaý qarjyǵa josparladyq, biraq jýyrda tiisti sheshim qabyldanady. Bul oblys ortalyǵynda turatyn halyqtyń turmysyn jeńildetedi. Sondyqtan muny júzege asyrý kerek. Úkimet atalǵan sheshimdi aiaǵyna deiin jetkizedi dep oilaimyn, – dedi Memleket basshysy.
Prezident aýyl sharýashylyǵy mashinalaryn jasaý isin damytý máselesine nazar aýdaryp, Kókshetaý qalasy osy saladaǵy basty tirek ortalyqtardyń biri ekenin atap ótti.
– Bul – el ekonomikasynyń asa mańyzdy ári perspektivti baǵyty. Búgin men Qazaqstannyń aýyl sharýashylyǵy derjavasyna ainalýy tiis dep aittym. Bul – órshil, biraq qol jetkizýge bolatyn maqsat. Osy rette oblystyń rólin asyra baǵalaý qiyn. Bul baǵytta biz memleketimizdiń aýyl sharýashylyǵy áleýetin kúsheitýge baǵyttalǵan Aqmola oblysynyń kúsh-jigerin qoldaimyz, – dedi Qasym-Jomart Toqaev.
Memleket basshysy ákimdiktiń turǵyn úi qurylysy jónindegi josparyn qoldady. Onyń pikirinshe, áleýmettik turǵyn úi bólý máselesin retteý qajet.
– Turǵyn úi qurylysyna bailanysty máselelerdi neǵurlym kóp sheshsek, soǵurlym mundai páter alǵysy keletin adamdar kóbeie túsedi. Atalǵan máseleni retteý qajet. Eshqandai negizsiz áleýmettik turǵyn úi kezegine turǵan adamdar tiisinshe elekten ótkizilýi kerek. Biraq, memlekettiń negizgi qyzmeti azamattardyń aldyndaǵy óz mindettemelerin oryndaý emes pe? Olardy áýre-sarsańǵa salýǵa múlde bolmaidy, – dedi Prezident.
Qasym-Jomart Toqaev aýyl ákimderiniń tikelei sailaýyn ótkizý týraly sheshimniń durystyǵyna taǵy bir márte toqtaldy. Prezidenttiń aitýynsha, sailaý ashyq ári ádil ótti. Turǵyndar tarapynan eshqandai shaǵym túsken joq. Aýyldaǵy aǵaiyn ózderiniń eldi mekenderin basqarýǵa qolaily kórgen adamdaryn sailady.
– Endi, jergilikti ákimder ózderin sailaǵan azamattardyń aldynda tikelei jaýap beredi. Olardyń óz baǵdarlamalary boldy. Sol baǵdarlamalardy júzege asyrýy qajet. Sonymen qatar oblys ákimderi sailanǵan azamattarǵa kómektesýi kerek. Osy rette men myna máselege erekshe mán bergim keledi. Sailanǵan ákimder ózderiniń kezdeisoq sailanbaǵanyn ispen dáleldeýi qajet. Olar óz baǵdarlamalaryn sózben emes, ispen oryndaýǵa tiis. Ókinishke qarai, biz kóp sóilep, az is atqaramyz. Al biz bul jaǵdaidy 180 gradýsqa ózgertkenimiz jón. Iaǵni, kóp istep, az sóileýimiz qajet, – dedi Memleket basshysy.
