Foto: Aqorda
Prezident qutqarýshylardy kásibi merekesimen quttyqtady, dep habarlaidy Ult.kz.
Memleket basshysy beibit kúnniń batyrlaryna shynaiy rizashylyǵyn bildirip, azamattyq qorǵaý salasynyń elimiz úshin strategiialyq mańyzy erekshe ekenin atap ótti.
"Byltyr alapat sý tasqyny kezinde sizder jurtty qaýipsiz jerge kóshirip, apattan aman alyp qaldyńyzdar. Qostanaida, Semeide jáne basqa da aimaqtarda bolǵan orman órtine qarsy turyp, tilsiz jaýmen kúrestińizder. Tótenshe jaǵdai bolǵan aimaqtarǵa ózim de arnaiy bardym. Erlikke bergisiz naǵyz eńbekti óz kózimmen kórdim. Sondyqtan azamattyq qorǵaý salasy mamandarynyń kásibi sheberligi jáne tabandy eńbeginiń arqasynda biz bir el bolyp barlyq qiyndyqty eńserdik dep tolyq senimmen aitýǵa bolady", - dedi Prezident.
Memleket basshysy jer júzinde túrli sebepterge bailanysty tabiǵi jáne tehnogendik apattar kóbeiip ketkenine toqtalyp, kásibi turǵydan bilikti, myqty mamandardy, iaǵni jańa zaman qutqarýshylaryn daiarlaýǵa erekshe nazar aýdarý qajet ekenin tilge tiek etti.
"Osy maqsatpen Kókshetaý tehnikalyq institýty Málik Ǵabdýllin atyndaǵy Azamattyq qorǵaý akademiiasy bolyp qaita quryldy. Qutqarýshy elimizdegi eń bedeldi mamandyqtyń birine ainalýǵa tiis. Memlekettik organdar qutqarýshylarǵa qoǵamda laiyqty baǵa berilýi úshin barynsha shara qabyldaýǵa mindetti", - dedi Memleket basshysy.
Prezident Úkimet pen salalyq ministrlik tótenshe jaǵdailardy ýaqtyly eskertýdiń jáne saldaryn joiýdyń tiimdi joldaryn qarastyrýǵa basa mán bergeni jón ekenin aitty.
"Ortalyqtaǵy jáne jergilikti qutqarý qyzmetteriniń is-qimyly – birtutas, naqty júielengen mehanizm. Basqarý úderisin avtomattandyrýǵa, tsifrlandyrýǵa, ózge de zamanaýi tehnologiialardy, sonyń ishinde jasandy intellektini keńinen engizýge kúsh salý mańyzdy. Sonymen birge ministrlik qazirdiń ózinde «Zań jáne tártip» ideologiiasy aiasynda ónerkásip nysandaryndaǵy qaýipsizdikti kúsheitip, órtke qarsy talaptar men qurylys normalaryn qatańdatý sharalaryn qabyldap jatyr. Azamattarǵa, eń aldymen, balalar men jastarǵa órt, sý tasqyny, jer silkinisi kezindegi qaýipsizdik erejelerin muqiiat, túsinikti tilmen jetkizý qajet. Olar apat kezinde qalai áreket etetinin bilýge tiis. Sonymen qatar kúndelikti ómirde, tynysh ýaqytta qaýipsizdik sharalaryn udaiy este saqtaǵany jón. Kópshilikti tabiǵat aiasynda demalý, sý aidynynda shomylý, taýǵa shyǵý, aýa-raiy jaisyz kezde jáne basqa da jaǵdailarda kólik júrgizý siiaqty azamattardyń densaýlyǵy men ómirine qater tóndiretin sátterde jaýapkershilik tanytýǵa úndeý mańyzdy", – dedi Memleket basshysy.
