Foto: Aqorda
Qasym-Jomart Toqaevqa óńirdiń biylǵy 7 aidaǵy áleýmettik-ekonomikalyq damýynyń qorytyndylary týraly esep berildi jáne aldaǵy jospary tanystyryldy, dep habarlaidy Aqordanyń baspasóz qyzmeti.
Prezidentke 2024 jyldyń qańtar-shilde ailarynda qysqa merzimdi ekonomikalyq indikator 112,4 paiyzdy quraǵany baiandaldy. Oblysqa 188,2 milliard teńge investitsiia tartyldy, sonyń ishinde jeke investitsiianyń mólsheri 136,7 milliard teńgege jetti.
Beibit Isabaevtyń aitýynsha, aimaq ekonomikasynyń agrarlyq salaǵa negizdelgenin eskere otyryp, paidalanylmaǵan jerlerdi qaitarý jáne ainalymǵa engizý sharalaryna, «Aýyl amanaty» baǵdarlamasyn júzege asyrý, qant óndirisin damytý máselelerine basa mán berilgen.
Memleket basshysyna ónerkásip óndirisin órkendetý, óńirge investitsiia tartý jaiynda málimet berildi. Atap aitqanda, birqatar perspektivti investitsiialyq joba iske asyrylyp jatyr. Olardyń qatarynda Kerbulaq aýdanyndaǵy metallýrgiia kombinaty, «Qorǵas – Shyǵys qaqpasy» arnaiy ekonomikalyq aimaǵyndaǵy «Qazaqstan-Qytai halyqaralyq ónerkásip qalasy» indýstrialdy parki, Jońǵar qaqpasy aýmaǵyndaǵy qýaty 1 GVt bolatyn jel elektr stantsiiasy siiaqty iri jobalar bar. Óńirdiń kólik-logistikalyq jáne tranzittik áleýetin arttyrý úshin júieli jumystar qolǵa alynǵan.
Qasym-Jomart Toqaevqa turǵyn úi-kommýnaldyq sharýashylyq salasynyń jai-kúii týraly aityldy. Oblys ákiminiń sózinshe, jyl sońyna deiin óńirdi gazben qamtý deńgeii 56,5 paiyzǵa jetedi. 2028 jylǵa qarai Jetisý oblysy kógildir otynmen tolyq qamtylady dep kútilip otyr. Sońǵy 2 jylda oblysta 86 áleýmettik infraqurylym nysany salynyp, jóndeýden ótken.
Prezidentke turǵyn úi jáne jol qurylysy, týrizmdi damytý jaiynda aqparat berildi. Jalpy Jetisýdyń týristik baǵyty Alakól, Balqash kólderi, «Altynemel», «Jońǵar Alataýy» ulttyq parkteri, Jońǵar Alataýynyń taý massivteri sekildi halyq jii baratyn oryndardyń áleýetine iek artady. Ekologiialyq týrizmdi damytý maqsatynda Burhanbulaq sarqyramasy men Jasylkólge aparatyn jol salý josparlanǵan.
Kezdesý sońynda Memleket basshysy óńirdi áleýmettik-ekonomikalyq turǵydan damytý jáne halyqtyń ál-aýqatyn jaqsartý baǵytyndaǵy jumystardy odan ári jalǵastyrýdy tapsyrdy.
